الماتىدا كوپقاباتتى اۆتوتۇراقتار سالىنادى

بۇل تۋرالى قالالىق موبيلدىلىك باسقارماسى حابارلادى.

قىزمەت كورسەتۋ ساپاسىن ارتتىرۋ ماقساتىندا اقىلى اۆتوتۇراق قىزمەتىن ۇيىمداستىرۋعا قاتىستى الماتىلىقتاردىڭ كوپتەگەن شاعىمدارى ساراپتالىپ جاتىر، دەپ حابارلايدى Almaty-akshamy.kz

 «ازاماتتار كوبىنە اۆتوتۇراقتاردىڭ تەحنيكالىق جاعدايىنا، تاڭبالاۋ مەن ارنايى سايكەستەندىرۋ بەلگىلەرىنىڭ جوقتىعىنا، تولەم جاساۋ كەزىندەگى قاتەلىكتەرگە، تۇراق ورىندارىنىڭ جەتكىلىكسىزدىگىنە جانە ت.ب. شاعىمدانۋدا. تۇرعىنداردىڭ وتىنىشتەرى جان-جاقتى ساراپتالىپ، قاراستىرىلعان. الداعى ۋاقىتتا اۆتوتۇراقتاردىڭ جۇمىسىن جاقسارتۋ بويىنشا شارالار قابىلداناتىن بولادى»، – دەپ حابارلادى باسقارمادا.

ۆەدومستۆونىڭ مالىمەتىنشە، الداعى ۋاقىتتا حالىقارالىق تاجىريبەنى ەسكەرە وتىرىپ، اقىلى اۆتوتۇراقتاردان تۇسەتىن قاراجاتتى كوشەلەر مەن اۋلالاردى اباتتاندىرۋعا پايدالانۋ ارقىلى قالالىق اۆتوتۇراقتاردى دامىتۋ تۇجىرىمداماسىن ازىرلەۋ جوسپارلانۋدا.

«سونىمەن قاتار قوردالانىپ قالعان ماسەلەلەردى شەشۋ ءۇشىن قالادا كوپقاباتتى اۆتوتۇراقتار سالۋ باسىمدىققا يە بولادى»، – دەپ حابارلادى باسقارما. 

ەسكە سالا كەتسەك، «الماتى سپەستەحپاركينگ سەرۆيس» ءجشس-نىڭ 70% ۇلەسىن جانە «الان پاركينگ» ءجشس-نىڭ 100% ۇلەسىن قالا مەنشىگىنە قايتارۋ تۋرالى ۇسىنىستار ەنگىزىلگەن. قوس كومپانيا شاھارداعى كولىك تۇراقتارىنىڭ باسىم بولىگىن باسقارىپ كەلگەن.