باسپانا الۋعا ارنالعان وڭتايلى باعدارلامالار
قالا كۇنى 227 كوپبالالى وتباسى «نۇرلى جەر» تۇرعىن ءۇي باعدارلاماسى بويىنشا سالىنعان «الما سيتي-5» تۇرعىن ءۇي كەشەنىنىڭ جاڭا پاتەرلەرىنە قونىس اۋداردى، دەپ حابارلايدى Almaty-akshamy.kz.
قالالىق تۇرعىن ءۇي ساياساتى باسقارماسى باسشىسىنىڭ ورىنباسارى ەرمەك ءامىروۆ وڭىرلىك كوممۋنيكاسيالار قىزمەتىندە وتكەن بريفينگتە قولجەتىمدى تۇرعىن ۇيمەن قامتاماسىز ەتۋ شارالارى تۋرالى ايتتى. "وتباسى بانك" ارقىلى جۇزەگە اساتىن «باقىتتى وتباسى» باعدارلاماسىنىڭ كومەگىمەن قولجەتىمدى تۇرعىن ءۇي الۋعا بولادى.
«بۇل باعدارلامانىڭ كومەگىمەن كوپ بالالى جانە تولىق ەمەس وتباسىلار، سونداي-اق مۇمكىندىگى شەكتەۋلى بالالاردى تاربيەلەپ وتىرعان وتباسىلار نارىقتا باستاپقى نەمەسە قوسالقى تۇرعىن ءۇيدى قولايلى شارتتارمەن الا الادى. باعدارلامانى 3 جىلدىڭ ىشىندە 634 الماتىلىق وتباسى قولداندى»، - دەدى ە.ءامىروۆ.
تۇرعىنداردىڭ الەۋمەتتىك وسال توبى ساناتىندا كەزەكتە تۇرعاندار ءۇشىن ۇلكەن كومەك – قايتارىمسىز تۇرعىن ءۇي سەرتيفيكاتتارىن الۋ مۇمكىندىگى. بۇل سوما "وتباسى بانكتەن" جەڭىلدىكپەن يپوتەكا الۋ ءۇشىن باستاپقى تولەمنىڭ ءبىر بولىگىن جابۋ ءۇشىن كوزدەلگەن.
سەرتيفيكاتتى كەزەكتە تۇرعان I جانە II توپتاعى مۇگەدەكتەر، مۇگەدەك بالالارى بار نەمەسە تاربيەلەپ وتىرعان وتباسىلار، جەتىم بالالار، اتا-اناسىنىڭ قامقورىنسىز قالعان بالالار جانە كوپ بالالى وتباسىلار الا الادى. الماتى اكىمدىگى 1 ميلليون تەڭگە سوماسىنا 2 000 قايتارىمسىز تۇرعىن ءۇي سەرتيفيكاتىن بەرۋگە جەرگىلىكتى بيۋدجەتتەن 2 ميلليارد تەڭگە ءبولدى.
جۇمىس ىستەيتىن جاستار «الماتى جاستارى» قالالىق باعدارلاماسىنا قاتىسا الادى. ونىڭ اياسىندا 1 000 جاس وتباسى باسپانامەن قامتاماسىز ەتىلدى.
«بيىل ءبىز تاعى 1 000 جاس وتباسىن قامتۋدى جوسپارلاپ وتىرمىز. قازىرگى تاڭدا ولاردىڭ 772ء-سى باسپانالى بولدى»، - دەپ تولىقتىردى ە. ءامىروۆ.
سونىمەن قاتار جۇمىس ىستەيتىن 1 050 جاستى 5 جىل مەرزىمگە جالعا بەرىلەتىن تۇرعىن ۇيمەن قامتاماسىز ەتۋ جوسپارلانىپ وتىر. ءسوز سوڭىندا تۇرعىن ءۇي ساياساتى باسقارماسى باسشىسىنىڭ ورىنباسارى الماتى قالاسى اكىمدىگىنىڭ ازاماتتاردى تۇرعىن ۇيمەن قامتاماسىز ەتۋ قارقىنىن ارتتىراتىنىن ايتتى.
ايتا كەتەرلىگى، قالا كۇنى مەرەكەسى بەس جىلدان بەرى باسپانا كەزەگىندە تۇرعان كوپ بالالى انا قورلان قادىرقۇلوۆا ءۇشىن ەكى ەسە ماڭىزدى بولدى. بۇرىن وتباسى جالدامالى پاتەردە تۇراتىن، ەندى ولار مەملەكەتتەن جالدامالى تۇرعىن ءۇي باعدارلاماسى بويىنشا الىنعان ءۇش بولمەلى كەڭ پاتەردە تۇرادى. سول تىزىمگە مەگاپوليستىڭ ەكى ميلليونىنشى تۇرعىنى ايالا جامبىلدىڭ وتباسى دا ەندى.