الماتىدا كوپ بالالى انانىڭ كولىگىن ۇرلاپ كەتكەن ەر ادام ۇستالدى

كولىك ۇرىسى "مازدا" اۆتوكولىكتەرىن ۇرلاۋعا ماشىقتانعان.

قالالىق كريمينالدىق پوليسيانىڭ مالىمەتىنشە، الماتى وبلىسىنىڭ 28 جاستاعى تۋماسىنا قاتىستى كولىك ۇرلاۋدىڭ ءۇش دەرەگى انىقتالدى. جاڭا ەپيزودتار دا جوققا شىعارىلمايدى، دەپ حابارلايدى Almaty-akshamy.kz Polisia.kz-كە سىلتەمە جاساپ.

«ۇستالعان ازامات تەك Mazda اۆتوكولىكتەرىن ۇرلاۋعا ماماندانعان. كۇدىكتىنى اشكەرەلەۋ جانە ۇستاۋ ءىس-شاراسىن ءبىزدىڭ بولىمشە قىزمەتكەرلەرى تۇركسىب اۋداندىق پوليسيا باسقارماسىنداعى ارىپتەستەرىنىڭ كومەگىمەن جۇرگىزدى. ونىمەن بىرگە ساتىپ الۋشى دا قاماۋعا الىندى. قاسكويلەر قىلمىستىق مامىلە كەزىندە ۇستالدى: ۇرلاۋشى بوتەننىڭ كولىگىن ەسىك قالاسىنا اكەلگەن، ال ساتىپ الۋشى كولىكتىڭ ۇرلانعانىن بىلە تۇرا، ونى قابىلداعان. ولار ءوز ىستەرىن بىردەن مويىندادى. جەدەل ىزدەستىرۋ شارالارى بارىسىندا قاسكويدىڭ تەك كۇندىزگى ۋاقىتتا ۇرلىق جاساعانى انىقتالدى. ول "مارت" ساۋدا ءۇيىنىڭ تۇراعىنان ەكى كولىكتى، ال بازاردىڭ تۇراعىنان تاعى ءبىر كولىكتى ۇرلاپ كەتكەن. ول قۇلىپتى اشىپ، قوزعالتقىشتى ىسكە قوسۋ ءۇشىن ارنايى تەحنيكانىڭ كومەگىمەن كولىكتى اشقان»، — دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.

پوليسيا كولىك ساتۋ تىزبەگىن سوڭىنا دەيىن باقىلاي الدى. ءۇش تەمىر تۇلپار ءۇشىنشى تۇلعالارعا قايتا ساتىلعان، ەكەۋىن بولشەكتەپ ۇلگەرمەگەن. اتالعان دەرەك بويىنشا قىلمىستىق ءىس تەرگەلۋدە. تەرگەۋ بارىسىندا قاسكويلەر ۋاقىتشا ۇستاۋ يزولياتورىنا قامالدى.