ءىىم جالعان اقپارات پەن ارانداتۋشىلىق ءۇشىن جاۋاپكەرشىلىك بار ەكەنىن ەسكەرتتى، – دەپ حابارلايدى Aqshamnews.kz.
ىشكى ىستەر مينيسترلىگى جالعان اقپارات پەن ارانداتۋشىلىق ءۇشىن جاۋاپكەرشىلىك بار ەكەنىن ەسكەرتتى ىشكى ىستەر مينيسترلىگىندە الەۋمەتتىك جەلىلەر مەن مەسسەندجەرلەردە جالعان اقپارات پەن ارانداتۋشىلىق سيپاتتاعى حابارلامالاردىڭ تارالۋ دەرەكتەرى ارتقانى مالىمدەلدى. قوعامدىق كەڭىستىكتە، ونىڭ ىشىندە قازاقستان رەسپۋبليكاسى جاڭا كونستيتۋسياسىنىڭ جوباسىنا قاتىستى، فاكتىلەردى ادەيى بۇرمالاۋ جانە جالعان مالىمەتتەر تاراتۋ جاعدايلارى تىركەلۋدە.
مۇنداي ارەكەتتەر ازاماتتاردى جاڭىلىستىرىپ، قوعامدىق تۇراقتىلىققا ءقاۋىپ توندىرەدى. مىسالى، الماتى قالاسىنىڭ تۇرعىنى ينتەرنەتتە جاڭا كونستيتۋسيا جوباسىندا جەردى شەتەلدىكتەرگە ساتۋعا تىيىم الىنىپ تاستالدى دەگەن جالعان اقپارات تاراتقان. ىشكى ىستەر مينيسترلىگى دەپارتامەنتىنىڭ باستىعى — رەسمي وكىلى شىڭعىس الەكەشيەۆتىڭ ايتۋىنشا، بۇل مالىمەتتەر شىندىققا سايكەس كەلمەيدى جانە ولاردى جالعان اقپاراتقا قارسى ءىس-قيمىل ورتالىعى رەسمي تۇردە جوققا شىعارعان. وسىعان بايلانىستى اتالعان ازامات جالعان اقپارات تاراتقانى ءۇشىن جاۋاپكەرشىلىككە تارتىلدى. سونداي-اق، اباي وبلىسىندا سەمەي قالاسىنىڭ تۇرعىنى جاڭا كونستيتۋسيا جوباسىندا مەملەكەتتىڭ ۋنيتارلىعى مەن اۋماقتىق تۇتاستىعىنا كۇمان كەلتىرەتىن تۇزەتۋلەر بار دەگەن جالعان اقپارات جاريالاعانى ءۇشىن جاۋاپكەرشىلىككە تارتىلدى. شىن مانىندە، بۇل قاعيداتتار جاڭا كونستيتۋسيا جوباسىندا كەرىسىنشە تىكەلەي بەكىتىلىپ، كۇشەيتىلگەن. ىشكى ىستەر مينيسترلىگى كونستيتۋسيا جوباسىن تالقىلاۋ، ازاماتتاردىڭ ءوز پىكىرلەرى مەن ۇستانىمدارىن ءبىلدىرۋى زاڭ بۇزۋشىلىققا جاتپايتىنىن ەسكە سالادى. جاۋاپكەرشىلىك تەك قانا كورىنەۋ جالعان اقپارات تاراتۋ جانە فاكتىلەردى ادەيى بۇرمالاۋ ءۇشىن كوزدەلگەن. قازىرگى ۋاقىتتا، ازاماتتاردى جاڭىلىستىرۋعا جانە قوعامدىق احۋالدى تۇراقسىزداندىرۋعا باعىتتالعان وزگە دە جالعان اقپارات تاراتۋ فاكتىلەرى انىقتالۋدا.
— ءبىز ازاماتتاردى ارانداتۋعا ەرمەۋگە جانە تەك رەسمي ءارى تەكسەرىلگەن اقپارات كوزدەرىنە سۇيەنۋگە شاقىرامىز. ىشكى ىستەر مينيسترلىگى جاعدايدى تولىق باقىلاۋدا ۇستاپ وتىر جانە كەز كەلگەن تۇراقسىزداندىرۋ ارەكەتتەرىنە قاتاڭ دەن قويادى، — دەپ اتاپ ءوتتى شىڭعىس الەكەشيەۆ.
ىشكى ىستەر مينيسترلىگى كورىنەۋ جالعان اقپارات تاراتۋ مەن ارانداتۋشىلىق ارەكەتتەر، سەبەپ-سالدارىنا قاراماستان، قازاقستان رەسپۋبليكاسىنىڭ زاڭناماسىنا سايكەس قىلمىستىق جانە اكىمشىلىك جاۋاپكەرشىلىككە اكەپ سوعاتىنىن اتاپ ءوتتى.