شاراعا الەمنىڭ 18 ەلىنەن 211 كومپانيا قاتىسادى.
الماتىدا 20-21 ساۋىردە «تۋريزم جانە ساياحات» - «KITF» XX قازاقستاندىق حالىقارالىق كورمەسى اشىلدى، دەپ حابارلايدى Almaty-akshamy.kz.
KITF كورمەسى ورتالىق ازياداعى B2B ءىرى سالالىق ءىس-شارا بولىپ تابىلادى، ونىڭ كورسەتكىشتەرى جىلدان جىلعا ارتىپ كەلەدى. بيىل كورمەگە الەمنىڭ 18 ەلىنەن 211 كومپانيا قاتىسادى (ءازىربايجان، بەلارۋس، گەرمانيا، گرۋزيا، ءۇندىستان، يندونەزيا، يتاليا، يسپانيا، قازاقستان، مالايزيا، ءباا، پولشا، سلوۆەنيا، تايلاند، تۇركيا، وڭتۇستىك كورەيا، وزبەكستان، جاپونيا). جوبا ءۇشىن مەرەيلى جىلى Antaal Life، EcoPark Tour، KOMPAS Touroperator، SCAT، AIR ASTANA، قازتۋر، تrip to the KZ جانە باسقا دا كوپتەگەن كومپانيالار وزدەرىنىڭ قاتىساتىندارىن مالىمدەدى.
KITF كورمەسىنە قاتىسۋ جاقىن ورنالاسقان ەلدەردىڭ تۋريستىك كومپانيالارى جانە تۋراگەنتتىكتەر ءۇشىن پەرسپەكتيۆالى شەشىم بولىپ تابىلادى. قازاقستانمەن ۆيزاسىز رەجيم، گەوگرافيالىق جاقىندىقتىڭ بولۋى جانە تىلدىك كەدەرگىنىڭ بولماۋى كورشى ەلدەردەگى كومپانيالاردىڭ قاتىسۋى ءۇشىن وبەكتيۆتى سەبەپتەر بولۋى مۇمكىن. كورمە شەڭبەرىندە اۋقىمدى ىسكەرلىك باعدارلاما وتەدى، ونىڭ ءىس-شارالارى وزەكتى سالالىق ماسەلەلەردى تىكەلەي كەلىسسوزدەر، نەتۆوركينگ جانە كاسىبي تاجىريبە الماسۋ فورماتىندا تالقىلاۋعا كومەكتەسەدى.
«الماتى – قازاقستاننىڭ ەڭ ءىرى مەگاپوليسى جانە كەلگەن شەتەلدىك تۋريستەر سانى بويىنشا ابسوليۋتتىك كوشباسشى. قالا ىسكەرلىك، ەكولوگيالىق، مادەني-ەتنوگرافيالىق، تاۋ شاڭعىسى ءتۋريزمىن، سونداي-اق وتباسىلىق دەمالىستى دامىتۋ ءۇشىن ۇلكەن مۇمكىندىكتەرگە يە. قازاقستانعا كەلگەن ءاربىر ەكىنشى شەتەلدىك ءتۋريستىڭ الماتىعا كەلەتىنىن ايتا كەتۋ كەرەك. وتكەن جىلى تۋريستەر سانى 65%-عا ءوسىپ، 1،2 ملن تۋريستكە جەتتى، بۇل رەسپۋبليكالىق كورسەتكىشتىڭ بەستەن ءبىر بولىگى - 5،4 ملن ادام. 2025 جىلعا قاراي 2،3 ملن تۋريست تارتۋدى جوسپارلاپ وتىرمىز»، - دەدى الماتى قالاسى تۋريزم باسقارماسىنىڭ باسشىسى سابينا امانگەلدى.
2021 جىلدىڭ قورىتىندىسى بويىنشا، الماتى قالاسىندا تۋريزم سالاسىندا كورسەتىلگەن قىزمەتتەر كولەمى 27،9 ملرد تەڭگەنى قۇرادى، بۇل 2020 جىلدىڭ كورسەتكىشىمەن سالىستىرعاندا 66%-عا ارتىق. تۋريزم سالاسىنا ينۆەستيسيا كولەمى 46،3% وسىممەن 100،7 ملرد تەڭگەنى قۇرادى.