الماتى اكىمى ەربولات دوسايەۆتىڭ تاپسىرماسىمەن كەزەكتە تۇرعان كوپبالالى وتباسىلارعا جانە حالىقتىڭ الەۋمەتتىك جاعىنان وسال توبىنىڭ وكىلدەرىنە تۇركسىب اۋدانى قونايەۆ اتىنداعى تۇتىنۋ كووپەراتيۆىندە («جاس قانات» ش/ا.) جالدامالى پاتەرلەر بەرىلەدى، دەپ حابارلايدى almaty-akshamy.kz
اۋدانى 60 شارشى مەتردەن 85 شارشى مەترگە دەيىنگى جاڭا پاتەرلەردىڭ كىلتىن تۇرعىن ءۇي كەزەگىندە تۇرعان 46 كوپبالالى وتباسى الدى. ءىس-شاراعا كوممۋنالدىق ينفراقۇرىلىمدىق دامىتۋ باسقارماسى، قۇرىلىس باسقارماسى، سونىمەن قاتار، مەردىگەر ۇيىمنىڭ وكىلدەرى قاتىستى.
الماتى قالاسى كوممۋنالدىق ينفراقۇرىلىمدى دامىتۋ باسقارماسى باسشىسىنىڭ ورىنباسارى عالىمجان ابدىشۇكىر ۇلى اۋماقتى اباتتاندىرۋ جۇمىستارى اياقتالعان بەتتە كەزەكتە تۇرعاندارعا بەرىلەتىنىن اتاپ ءوتتى. «الماتى اكىمدىگى تۇرعىن ءۇي كەشەنىندە دامىعان ينفراقۇرىلىمدى قۇرۋعا دەن قويادى. مۇندا سپورت جانە بالالار الاڭدارى جابدىقتالعان، مەكتەپ بار، جاڭا بالاباقشا سالىنىپ جاتىر، كەلەسى جىلى تۇرعىنداردىڭ دەمالى مەن بوس ۋاقىتىن پايدالى وتكىزۋگە ارنالعان ورىندار بوي كوتەرەدى»، - دەدى ول.
بارلىعى «جاس قانات» شاعىن اۋدانىندا كەزەكتە تۇرعاندارعا 401 جالدامالى پاتەر بەرۋ جوسپارلانعان بولاتىن. ءۇي كەزەڭ-كەزەڭىمەن بەرىلەدى. ءبىرىنشى كەزەڭ تۇرعىندارعا ىڭعايلى كەز - جاڭا وقۋ جىلى قارساڭىندا – تامىزدىڭ سوڭىندا باستالدى. ەكىنشى كەزەڭ قىركۇيەكتە باستالدى. بارلىعى 300-دەن استام وتباسى قونىستاندى.
ايتا كەتەيىك، قونايەۆ اتىنداعى تك-دەگى ۇيلەردىڭ قۇرىلىسى 2021 جىلى قولدانىستا بولعان «نۇرلى جەر» تۇرعىن ۇي-كوممۋنالدىق دامۋىنىڭ 2020-2025 جىلدارعا ارنالعان مەملەكەتتىك باعدارلاماسى اياسىندا باستالعان.