الماتىدا 29 ناۋرىزدان باستاپ ورماندى القاپتاردا، قالا ساياباقتارى مەن گۇل باقتاردا كەنەلەرگە قارسى دەزينسەكسيالىق وڭدەۋ جۇمىستارىنىڭ ءبىرىنشى كەزەڭى باستالادى. بۇل تۋرالى الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا ايتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«الماتى قالاسىندا 29 ناۋرىزدان باستاپ جالپى اۋدانى 2424،54 گا قۇرايتىن ورماندى القاپتاردا، قالا ساياباقتارى مەن گۇل باقتاردا كەنەلەرگە قارسى دەزينسەكسيالىق وڭدەۋ جۇمىستارىنىڭ ءبىرىنشى كەزەڭى باستالادى. وڭدەۋ جۇمىستارى 8 ورماندى القاپ (1904،924 گا)، 144 قالا ساياباقتارى مەن سكۆەرلەردە (519،616 گا) جۇرگىزىلەدى جانە اۋا-رايىنا بايلانىستى قۇرعاق، جاۋىن-شاشىنسىز كۇندەرى كەستەگە سايكەس 29 ناۋرىزدان 28 ساۋىرگە دەيىن جۇرگىزىلەدى. كەنە ەنسەفاليتىنە قارسى كۇرەستىڭ ناتيجەسى ساپالى بولۋى ءۇشىن وڭدەۋ جۇمىسى ەكى كەزەڭدە جۇرگىزىلەدى. ەكىنشى كەزەڭ مامىر، ماۋسىم ايلارىندا جۇرگىزىلەتىن بولادى»، - دەدى اسەل قالىقوۆا.
دەزينسەكسيالىق ءىس-شارانى قالالىق سانيتارلىق-ەپيدەميولوگيالىق باقىلاۋ قىزمەتىنىڭ ماماندارىنىڭ تىكەلەي باقىلاۋىمەن «الماتى قالاسىنىڭ دەزينفەكسيا ورتالىعى» فيليالى اتقارادى. جاساقتالعان دەزبريگادالار قاجەتتى قۇرالدارمەن، كولىكتەرمەن جانە جەكە باس قورعانىش زاتتارىمەن جابدىقتالعان.
«كەنە ەنسەفاليتىنە قارسى دەزينسەكسيالىق وڭدەۋ جۇمىستارىن جۇرگىزۋ ءۇشىن «فاۆوريت» اكاريسيدتىك پرەپاراتى قولدانىلادى. پرەپارات از ۋىتتى جانە قاۋىپتىلىگى تومەن ساناتقا جاتقىزىلادى. كەنەلەرمەن كۇرەسۋ ءۇشىن قولدانىلاتىن دوزالار ەڭ از جانە ادامدار مەن جانۋارلار ءۇشىن ءقاۋىپسىز بولىپ تابىلادى. وڭدەۋ جۇمىستارى تاڭعى ۋاقىتتاردا جۇرگىزىلەدى. وڭدەلەتىن اۋماقتاردىڭ شەكارالارىندا «كەنەگە قارسى وڭدەۋ جۇرگىزىلۋدە» ەسكەرتۋ حابارلامالارى بار تاقتالار ورناتالادى»، - دەدى سپيكەر.
كەنەگە قارسى وڭدەۋ جۇمىستارىنا بايلانىستى دارىگەر قالا تۇرعىندارىنا كەلەسى ساقتىق شارالارىن ساقتاۋعا شاقىردى.
«اكاريسيدتى پرەپاراتتىڭ ەرىتىندىسىن دەنەگە نەمەسە كيىمگە تيگىزىپ الماس ءۇشىن كەنەگە قارسى دەزينسەكسيالىق وڭدەۋ جۇمىستارى جۇرگىزىلگەن جەرلەردەن قاشىقتاۋ ءجۇرۋ كەرەك، جەرگە شاشىراعان پرەپاراتتار قۇرعاعانشا ءۇي جانۋارلارىن وڭدەۋ جۇمىستارى جۇرگىزىلگەن ايماققا جىبەرمەۋ كەرەك، وڭدەۋ جۇمىستارى جۇرگىزىلگەن جەرلەردەن 40 كۇن بويى ساڭىراۋقۇلاق، ءشوپ نەمەسە جيدەكتەردى جيناۋعا، پايدالانۋعا بولمايدى، قالا تۇرعىندارى مەن قوناقتارى كەنەگە قارسى وڭدەۋ كەزىندە جانە ودان كەيىن ءۇش كۇن ىشىندە ساياباقتارعا، گۇل باعىندارعا جانە تابيعي وشاقتارعا بارماۋى كەرەك»، - دەپ ەسكەرتتى اسەل قالىقوۆا.