كۇدىكتىلەر سوڭعى رەت 5 ماۋسىمدا الماتىنىڭ مەدەۋ اۋدانىندا ۇرلىق جاساعان.
پوليسيا دەپارتامەنتى باستىعىنىڭ تەرگەۋ جونىندەگى ورىنباسارى رۋستام ءابدىراحمانوۆتىڭ ايتۋىنشا، الماتىدا كاتاليزاتور ۇرلاۋمەن اينالىسقان قىلمىستىق توپ ۇستالدى، دەپ حابارلايدى Almaty-akshamy.kz.
توپ 1998، 1999 جانە 2000 جىلى تۋعان جاستاردان تۇرعان. كۇدىكتىلەر سوڭعى رەت 5 ماۋسىمدا الماتىنىڭ مەدەۋ اۋدانىندا ۇرلىق جاساعان.
كۇدىكتىلەر تۇرعىن ءۇي اۋلاسىنداعى «تويوتا پرادو» اۆتوكولىگىنەن كاتاليزاتورى بار گلۋشيتەلدى تولىعىمەن شەشىپ الىپ، سول ارقىلى 500 مىڭ تەڭگە كولەمىندە ماتەريالدىق شىعىن كەلتىرگەن. 5 ماۋسىمدا جەدەل ىزدەستىرۋ ءىس-شارالارى بارىسىندا كۇدىكتىلەر ۇستالدى.
ۇستالعاندار قىلمىستارىن مويىنداپ، ۋاقىتشا ۇستاۋ يزولياتورىنا قامالدى. ولاردىڭ قالانىڭ تۇركسىب، بوستاندىق، اۋەزوۆ اۋداندارىندا وسىعان ۇقساس 9 قىلمىس جاساۋعا قاتىسى بار ەكەنى دالەلدەندى.
ۇرلانعان بولشەكتەردى قابىلداپ، ساتىپ الىپ وتىرعان ەر ادام دا انىقتالىپ، ۇستالدى.
«ول كولىكتەردىڭ كاتاليزاتورلارىن بولشەكتەلگەن كۇيىندە العانىن، سودان كەيىن مەتالدىڭ قۇرامى مەن قۇنىن انىقتايتىن ارنايى اناليزاتور ارقىلى باعالاۋ جۇرگىزىلگەنىن ايتتى. سودان كەيىن كاتاليزاتورلاردى تاپسىرعان ادامعا اكت تولتىرىلدى. زاتتار ودان ءارى زاۋىتقا ساتۋ ءۇشىن دايىندالدى. بۇگىندە جەدەل ىزدەستىرۋ جانە تەرگەۋ شارالارى جۇرگىزىلىپ جاتىر»، - دەلىنگەن جازبادا.