ءۇش ايىپتالۋشى دا ءوز كىناسىن تولىق مويىنداپ، جابىرلەنۋشىلەرگە كەلتىرىلگەن شىعىندى ءىشىنارا وتەدى
ناۋرىزباي اۋداندىق سوتىندا وزدەرىن توتەنشە جاعداي ماماندارى رەتىندە تانىستىرىپ، كاسىپكەرلەردەن اقشا بوپسالاعان الاياقتارعا قاتىستى سوت ۇكىمى شىقتى، دەپ حابارلايدى Almaty-akshamy.kz.
قىلمىستىق ءىس الماتى قالاسى ناۋرىزباي اۋداندىق سوتىندا قارالدى. سوت «نۇر-سۇلتانپروم بەزوپاسنوست» ءجشس-نىڭ ءۇش قىزمەتكەرىن ق ر قىلمىستىق كودەكسىنىڭ 190-بابىنىڭ 3-بولىگىمەن (الاياقتىق) كىنالى دەپ تانىپ، پروباسيالىق باقىلاۋ ورناتا وتىرىپ ءارقايسىسىنا 4 جىلعا شارتتى جازا تاعايىندادى.
سونداي-اق سوتتالعاندار سوت ۇكىمى زاڭدى كۇشىنە ەنگەن كۇننەن باستاپ 10 كۇن ىشىندە پروباسيا قىزمەتىنە تىركەلۋگە مىندەتتى.
ولار تۇرعىلىقتى جەرىن، جۇمىسىن، وقۋىن وزگەرتپەۋى ءتيىس. بۇدان بولەك، ويىن-ساۋىق مەكەمەلەرىنە بارۋلارىنا تىيىم سالىنادى. ءۇش ايىپتالۋشى دا ءوز كىناسىن تولىق مويىنداپ، جابىرلەنۋشىلەرگە كەلتىرىلگەن شىعىندى ءىشىنارا وتەدى. بۇعان دەيىن الماتى قالالىق پروكۋراتۋراسى «نۇر-سۇلتانپروم بەزوپاسنوست» ج ش س قىزمەتكەرلەرى وزدەرىن تج ورگاندارىنىڭ ماماندارى رەتىندە تانىستىرىپ، بيزنەس سۋبەكتىلەرىنە ايىپپۇل سالامىز دەپ قورقىتقانىن ايتقان بولاتىن.
اتالعان فاكتىلەر بويىنشا ناۋرىزباي اۋدانىنىڭ پروكۋراتۋراسى قىلمىستىق ءىستى قوزعاۋعا باستاماشىلىق ەتتى، ناتيجەسىندە الاياقتىق جاسادى دەگەن كۇدىكپەن 1991 جانە 1995 جىلى تۋعان ءۇش ازامات ۇستالعان ەدى.