الماتىنىڭ ۋچاسكەلىك ينسپەكتورى كامپيتكە قاقالىپ قالعان كىشكەنتاي قىزدىڭ ءومىرىن قالاي قۇتقارعانىن ايتىپ بەردى، دەپ حابارلايدى Almaty-akshamy.kz Polisia.kz-كە سىلتەمە جاساپ.
المالى اۋداندىق پوليسيا باسقارماسىنىڭ ۋچاسكەلىك ينسپەكتورى باقداۋلەت مامىردىڭ ايتۋىنشا، وتكەن مەرەكە كۇندەرى قايعىلى وقيعا بولا جازداعان. ول كۇنى بويى قالانىڭ قوعامدىق ورىندارىندا ءتارتىپتى قامتاماسىز ەتىپ، كەشكىسىن ۇيىنە قايتىپ بارا جاتقان.
«رىسقۇلوۆ پەن مومىش ۇلى كوشەلەرىنىڭ قيىلىسىندا ايەل ادامنىڭ ايعايلاعان داۋىسىن ەستىدىم. توقتادىم، جۇگىرىپ باردىم، ايەلدىڭ بالاسىن قۇتقارماق بولىپ جاتقانىن كوردىم. ول كىشكەنتاي قىزدىڭ كامپيتكە قاقالىپ قالعانىن ايتتى. مەن وتە جىلدام ارەكەت ەتتىم، اۆتوماتتى تۇردە: بالانىڭ باسىن تومەن قاراتىپ كوتەردىم، ارقاسىنان بىرنەشە رەت ۇردىم، كامپيت اۋزىنان ۇشىپ كەتتى. بارلىعى وتە تەز بولدى. مەن قىزدىڭ اتىن دا سۇرامادىم، ءوزىمدى دە تانىستىرماپپىن. بالانىڭ امان قالعانىنا ءبارىمىز قۋاندىق. بۇل - مەنىڭ پوليسيا قىزمەتكەرى رەتىندەگى بورىشىم»، – دەدى مامىر.
ۋچاسكەلىك ينسپەكتور بۇل جاعدايدىڭ سوڭى قايعىلى بولۋى دا مۇمكىن ەكەنىن ايتادى. پوليسەي ءسابيدىڭ ءومىرىن امان الىپ قالعانىنا شۇكىرشىلىك ەتەتىنىن جاسىرمادى.