اناسىمەن بىرگە تاماقتانۋعا بارعان بالا پاستا جەگەن.
الماتىلىق ديزاينەر روكا 4 جاستاعى ۇلىمەن كافەگە بارىپ، پاستا العان. ءبىراق بالاسى بالىقتىڭ قىلتىعىن جۇتىپ قويىپ، اۋرۋحانادان ءبىر-اق شىعىپتى. بۇل وقيعا تۋرالى ول الەۋمەتتىك جەلىدەگى پاراقشاسىنا جازدى، دەپ حابارلايدى aqshamnews.kz
بالا اقسەركە بالىعى قوسىلعان فەتۋچيني پاستاسىن تاڭداپتى. ءبىراق جەي باستاعاندا بىردەن مامالاپ، "تاماعىمدا بىردەڭە تۇر" دەپ شاعىمدانعان. اناسى العاشقىدا سۋ بەرىپ، كەتەتىن شىعار دەپ ويلاعان. 5 مينۋتتان سوڭ دا كەتپەگەسىن، اناسى ۇلىنىڭ شاعىمىنا بەيجاي قاراماي، كافە اكىمشىلىگىنەن جەدەل جاردەم شاقىرۋىن وتىنگەن.
"مەيرامحانا اكىمشىلىگىنە ءقازىر توتەنشە جاعداي بولىپ تۇرعانىن ءتۇسىندىرىپ ايتتىم. سونىمەن جەدەل جاردەم كەلدى دە، ءبىزدى №2 اۋرۋحاناعا اپاردى. ول جەردە بالامدى حيرۋرگ قارادى دا، "ەشتەڭە جوق، باس سۇيەك حيرۋرگياسى بولىمىنە بارىپ كورىڭىزدەر" دەدى. ال باس سۇيەك حيرۋرگياسىنداعى دارىگەر اپپاراتىمەن ۇلكەيتىپ تۇرىپ بالامنىڭ تاماعىندا بالىقتىڭ قىلتىعى تۇرعانىن كوردى. جاقسى مامانعا تاپ بولدىق، بالاما وتە جاقسى قارىم-قاتىناس جاساپ، كەلىسىپ وتىرىپ قىلتىقتى تەز شىعارىپ بەردى. وسى ارالىقتا تەلەفونىم پوليسيا باسقارماسىنىڭ قوڭىراۋىنان جارىلىپ جاتتى. سەبەبى جەدەل جاردەم شاقىرعاندا اقپارات پوليسياعا دا تۇسكەن"، – دەپ باياندادى ول بولعان وقيعانى.
روكا ەسىمدى ديزاينەر بۇل وقيعا تۋرالى Threads جەلىسىنە جازدى. ول بۇل وقيعادان شۋ شىعارۋدى ماقسات ەتپەيتىنىن اتاپ ءوتتى.
"بۇل وقيعادان قانداي دا ءبىر پايدا كورەيىن دەپ وتىرعان جوقپىن. مەيرامحانا اكىمشىلىگىنەن دە بولعان وقيعانىڭ شىعىنىن تالاپ ەتپەيمىن. مەنىڭ ويىمشا، قانداي جاعدايدا دا ادام بولىپ قالۋ كەرەك جانە مەيرامحانا ادەيى جاساماعانىن ءتۇسىنۋ كەرەك. اكىمشىلىك ارتىمىزدان اۋرۋحاناعا باردى، ءبىزدى كولىگىمىز تۇرعان جەرگە جەتكىزىپ سالدى. سونىمەن قاتار ۇيگە بارىپ، الاڭسىز تاماقتانۋىمىز ءۇشىن تاماق سالىپ بەردى. قامقورلىقتارىن كورسەتتى. مەنىڭ ءبىر قۋانعانىم – بالامنىڭ شاعىمىنا بەيجاي قاراماي، جەدەل ارەكەت ەتكەنىم"، -دەپ ءبولىستى انا.