الماتىدا ءبىلىم بەرۋ ينفراقۇرىلىمىن دامىتۋ بويىنشا قارقىندى جۇمىس جۇرگىزىلىپ جاتىر. قالا اكىمىنىڭ ورىنباسارى ازامات قالدىبەكوۆ وڭىرلىك كوممۋنيكاسيالار قىزمەتىنىڭ الاڭىندا وسىلاي دەپ حابارلادى.
«ءقازىر الماتى قالاسىندا 349 مەكتەپ بار، وندا 354 مىڭنان استام وقۋشى ءبىلىم الىپ جاتىر. حالىق سانى جىل سايىن 12–14 مىڭ ادامعا ءوسىپ جاتقاندىقتان 33 مىڭنان استام وقۋشى ورنى جەتىسپەيدى. قابىلدانىپ جاتقان ءىس-شارالاردىڭ ناتيجەسىندە بيىل بۇل تاپشىلىق 16 500 ورىنعا دەيىن ازايادى»، – دەدى قالا اكىمىنىڭ ورىنباسارى.
شاھاردا «كەلەشەك مەكتەپتەرى» جوباسى دا ۇلكەن قارقىنمەن ىسە اسا باستادى. بۇگىنگى تاڭدا جالپى سىيىمدىلىعى 34،8 مىڭ وقۋشى ورنىن قامتيتىن 21 مەكتەپ سالىنىپ جاتىر.
جوبا اياسىندا 12 600 ورىندىق 8 جاڭا مەكتەپ سالىنىپ، پايدالانۋعا بەرىلدى. قازان ايىنىڭ سوڭىنا دەيىن تاعى 10 500 ورىندىق 5 مەكتەپتىڭ اشىلماق. سونىمەن قاتار، جەكە ينۆەستيسيالار ەسەبىنەن «ساتىپ الۋ» تەتىگى ارقىلى سالىنعان 11 700 ورىندىق 8 مەكتەپ بيىل پايدالانۋعا بەرىلەدى.
«بۇدان بولەك، 2025 جىلدىڭ سوڭىنا دەيىن 550 ورىندىق ءبىر مەكتەپتى اشىپ، جالپى سىيىمدىلىعى 2 100 ورىندى 2 مەكتەپتى ساتىپ الىپ، 6 مەكتەپكە جاپسارجايلار سالۋ جوسپارلانعان. بۇل قوسىمشا 1 795 ورىن بەرەدى»، – دەپ اتاپ ءوتتى قالا اكىمىنىڭ ورىنباسارى.
قالادا سونىمەن قاتار 31 مەكتەپتىڭ ءتىزىمى بەكىتىلگەن «2025–2027 جىلدارعا ارنالعان 1300 مەكتەپتى جاڭالاۋ» جوباسى ىسكە اسىرىلىپ جاتىر. بيىل 15 مەكتەپتە جوندەۋ-قايتا جاڭارتۋ جۇمىستارى جوسپارلانعان، ولاردىڭ التاۋىندا (№160، 73، 60، 50، 30 جانە 124) قۇرىلىس جۇمىستارى باستالىپ كەتتى. كەلەر جىلى تاعى 9 مەكتەپ، 2027 جىلى 7 ءبىلىم بەرۋ نىسانى جاڭارتىلادى.
جاڭارتۋ باعدارلاماسىن جۇزەگە اسىرۋ مەكتەپتەردىڭ جالپى سىيىمدىلىعىن شامامەن 5 مىڭ ورىنعا ارتتىرىپ، عيماراتتاردىڭ سەيسموتۇراقتىلىعىن كۇشەيتىپ، مۇعالىمدەر مەن وقۋشىلارعا جايلى جاعداي جاساۋعا مۇمكىندىك بەرەدى.