الماتىدا جىل سوڭىنا دەيىن ءبىرىڭعاي ۆيدەومونيتورينگ جۇيەسىنىڭ 50 مىڭ ۆيدەوكامەراسى قوسىلادى
الماتىدا 2024 جىلدىڭ سوڭىنا دەيىن 2022 جىلى ىسكە قوسىلعان ءبىرىڭعاي ۆيدەومونيتورينگ جۇيەسىنىڭ (بۆمج) 50 مىڭ ۆيدەوكامەراسى قوسىلاتىن بولادى. بۇل تۋرالى مەگاپوليستىڭ سيفرلاندىرۋ باسقارماسى حابارلادى.
جىل باسىنان بەرى قازىرگى ۋاقىتقا دەيىن قالا اكىمدىگىنىڭ جوبالىق ءوفيسىنىڭ قولداۋىمەن شىعارىلعان 15 مىڭ كامەرانى ەسكەرە وتىرىپ، 45 مىڭ كامەرا قوسىلدى، ال 2025 جىلعا قاراي بۇل سان 70 مىڭعا دەيىن ارتادى. ۆيدەوجازبالار 209 جەكە جانە 613 مەملەكەتتىك نىسانداردان الىندى.
سونىمەن قاتار، الماتىدا جول قاۋىپسىزدىگىن قامتاماسىز ەتۋ ءۇشىن «سەرگەك» اپپاراتتىق-باعدارلامالىق كەشەنىنىڭ (ابك) 300 كامەراسى ورناتىلعان. وسىلايشا، بۇگىندە 1 641 ابك جۇمىس ىستەيدى.
سونداي-اق، وسى جىلدىڭ سوڭىنا دەيىن 71 دەنساۋلىق ساقتاۋ وبەكتىسىنىڭ اۋماعىندا «قاۋىپسىزدىكتىڭ كەشەندى جۇيەسى» جوباسىن ىسكە اسىرۋ اياقتالادى.