14 جاسقا دەيىنگى بالالار اراسىندا كوپ تىركەلدى.
الماتىدا ءجىتى رەسپيراتورلىق ۆيرۋستىق ينفەكسيانى (جرۆي) بالالار كوپ جۇقتىرعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
الماتى قالالىق سانيتاريالىق-ەپيدەميولوگيالىق باقىلاۋ دەپارتامەنتىنىڭ مالىمەتىنشە، جىل باسىنان بەرگى 19 اپتاسىندا قالادا ءجرۆي-دىڭ 2 384 جاعدايى تىركەلگەن. بۇل وتكەن جىلدىڭ ۇقساس كەزەڭىندەگى كورسەتكىشتەن 32،7%-عا تومەن. دەگەنمەن، قالادا جرۆي-مەن اۋىرۋ 14 جاسقا دەيىنگى بالالار اراسىندا كوپ تىركەلدى. ولاردىڭ ۇلەس سالماعى 72،0%-دى قۇرادى.
«وتكەن جىلدىڭ 1 قازانىنان بيىلعى 11 مامىرعا دەيىن بارلىعى 192 890 جرۆي دەرەگى تىركەلدى. بۇل وتكەن جىلدىڭ سايكەس كەزەڭىمەن سالىستىرعاندا 28،6%-عا جوعارى. بالالاردىڭ اۋرۋشاڭدىعى 59،2%-دى كورسەتتى. سونداي-اق، اعىمداعى ەپيدەميولوگيالىق ماۋسىم باستالعالى بەرى قالادا ا/H3N2 ءتيپتى تۇماۋ ۆيرۋسى، باسقا دا جرۆي ۆيرۋستارى ءجۇر. مىسالى، رس ۆيرۋسى، ادەنوۆيرۋس، رينوۆيرۋس جانە ماۋسىمدىق كوروناۆيرۋس اينالىمدا. جالپى تۇماۋمەن سىرقاتتانۋدىڭ 51 جاعدايى تىركەلىپ، بارلىق ناۋقاستار ەم الدى»، - دەلىنەدى ۆەدومستۆو حابارلاماسىندا.
وسىعان بايلانىستى، قالالىق سانيتاريالىق-ەپيدەميولوگيالىق باقىلاۋ دەپارتامەنتى قالا تۇرعىندارىن جرۆي، تۇماۋعا قارسى الدىن الۋدىڭ جالپى شارالارىن ساقتاۋعا شاقىردى.
«جرۆي-مەن اۋىراتىن ناۋقاستارمەن جاناسۋدان اۋلاق بولىڭىز، ەگەر سىرقاتتانعان اداممەن بايلانىسقا تۇسكەن بولساڭىز، وندا ماسكا كيىپ، وكسولين مايىن قولدانىڭىز؛ - اۋرۋعا شالدىققان جاعدايدا ۇيدە بولۋ، ءوزىن-وزى ەمدەۋمەن اينالىسپاۋ، مەديسينا قىزمەتكەرىن شاقىرىپ، وتباسى ورتاسىندا نەمەسە ۇجىمدا بولعان كەزدە ماسكا كيۋ، دارىگەردىڭ تاعايىنداۋى بويىنشا ەم الۋ قاجەت؛ - تۇشكىرۋ جانە جوتەل كەزىندە اۋزىڭىزدى قولىڭىزبەن، مايلىقپەن، شارفپەن جاۋىپ، قولىڭىزدى مۇمكىندىگىنشە ءجيى جۋىڭىز؛ - يممۋندىق جۇيەنى ارتتىرۋ: س ءۆيتامينىن جانە دارىگەردىڭ ۇسىنىسى بويىنشا باسقا دارى-دارىمەكتەردى قولدانۋ؛ - قاشىقتىقتى ساقتاۋ، كوپ ادام جينالعان ءىس-شارالارعا قاتىسۋدى قىسقارتۋ، اسىرەسە جرۆي، تۇماۋ اۋرۋىنىڭ كوتەرىلۋى كەزەڭىندە، ءۇي-جايلاردى ىلعالدى جيناۋ جۇرگىزۋمەن جەلدەتۋ؛ - اۋرۋ بالالاردى مەكتەپتەرگە، مەكتەپكە دەيىنگى بالالار مەكەمەلەرىنە جىبەرمەۋ. وسى قاراپايىم ەرەجەلەردى ساقتاۋ تۇماۋ مەن ءجرۆي-دىڭ الدىن الۋعا كومەكتەسەدى»، - دەپ ەسكەرتتى دەپارتامەنتتەن.
ەسكە سالايىق، بۇعان دەيىن الماتىدا تۇماۋ مەن جرۆي-عا شالدىعۋ ازايعانىن جازعان بولاتىنبىز.