ەلىمىزدە جول جوندەۋ جۇمىسى تۋرالى نەشە ءتۇرلى پىكىر بار. ولاردىڭ دەنى ساپاعا، جولعا توسەلەتىن قوسپالارعا قاتىستى ايتىلىپ جاتادى. سوندىقتان جول اكتيۆتەرى ساپاسىنىڭ ۇلتتىق ورتالىعى الماتى فيليالىنىڭ ديرەكتورى ماۋلەن الىپوۆتەن جول قۇرىلىسىنا قاتىستى ساۋالىمىزدى قويىپ كوردىك.
وتكەن جىلى جول جوندەۋ جۇمىستارىنىڭ باقىلاۋ اياسىندا قانشا كوشەگە تەكسەرىس جۇرگىزىلدى؟
2024 جىلى الماتى قالاسىندا جول جوندەۋ جۇمىستارى قارقىندى جۇرگىزىلدى. وسى جۇمىستاردىڭ ساپاسىن باقىلاۋ ماقساتىندا الماتى قالاسىنىڭ قالالىق موبيلدىلىك باسقارماسى جانە 8 اۋدان اكىمشىلىكتەرىمەن جاسالعان كەلىسىمشارت اياسىندا ءبىزدىڭ مەكەمەمىز 643 ينسپەكسيالىق تەكسەرىس جۇرگىزدى. بۇل تەكسەرىستەر بارىسىندا 1 873 استام جول قۇرىلىس ماتەريالدارىنىڭ سىنامالارى الىنىپ، زەرتحانالىق سىناقتاردان وتكىزىلدى. ناتيجەسىندە، نورماتيۆتىك تەحنيكالىق قۇجاتتارعا سايكەس كەلمەيتىن 363 سىناما (19،3%) انىقتالدى.
ساپانى تومەندەتكەن كومپانيالارعا قانداي شارالار قابىلداندى؟
تەكسەرىس بارىسىندا 208 بۇزۋشىلىق تىركەلدى. ولاردىڭ ناتيجەسىندە، مەردىگەر ۇيىمدار ءوز قاراجاتى ەسەبىنەن 183 ميلليون تەڭگە سوماسىنا جۇمىستاردى قايتا قۇرىلىمداۋعا ءماجبۇر بولدى. بۇل تاپسىرىس بەرۋشى تاراپىنان تومەن ساپالى جۇمىستاردى قابىلداپ، تولەم جاساپ، جاۋاپكەرشىلىكتى ءوز موينىنا الۋ تاۋەكەلىن ايتارلىقتاي تومەندەتتى. سونىمەن قاتار، الماتى قالاسىنىڭ قالالىق قۇرىلىس باقىلاۋ باسقارماسىنا 15 ءوتىنىش بەرىلدى. 1 مەردىگەر ۇيىم مەن 1 ينجەنەرلىك قىزمەتكە 2،5 ميلليون تەڭگە مولشەرىندە ايىپپۇل سالىنىپ، 2 جاعدايدا تەحنيكالىق باقىلاۋشى ساراپشىلاردىڭ جۇمىسىن توقتاتۋ شارالارى قابىلداندى.
جول ساپاسىن ارتتىرۋ ءۇشىن قانداي جاڭا ماتەريالدار ويلاپ تابىلدى؟
زەرتتەۋ ينستيتۋتى رەتىندە ءبىزدىڭ ماقساتىمىز — جول قۇرىلىسىندا قولدانىلاتىن ماتەريالداردىڭ ساپاسىن ارتتىرۋ جانە ولاردىڭ ۇزاق مەرزىمدىلىگىن قامتاماسىز ەتۋ. وسى ماقساتتا ءبىرقاتار جاڭا ماتەريالدار مەن تەحنولوگيالار ەنگىزىلدى، ولار تەكسەرىستەن ءوتىپ، جوعارى ساپالى جانە ءقاۋىپسىز بولىپ شىقتى. الايدا، بۇل پروسەسس ۇزدىكسىز جۇرگىزىلۋدە، سوندىقتان ساپانى ارتتىرۋ بويىنشا جۇمىستار جالعاسۋدا.
بيىلعى جىلى مەگاپوليس كوشەلەرىن جوندەۋگە باقىلاۋ جۇرگىزىلە مە؟
الماتى قالاسىنىڭ قالالىق موبيلدىلىك باسقارماسىنىڭ حابارلاۋىنشا، 2025 جىلى قالادا 300 شاقىرىم جولدى ورتاشا جوندەۋ، 30 شاقىرىم تروتۋار سالۋ جانە 35 شاقىرىم جاڭا جول سالۋ جوسپارلانىپ وتىر. بۇل جۇمىستار قالاداعى ساپالى جولداردىڭ ۇلەسىن 2024 جىلعى 92%-دان 2025 جىلى 95%-عا دەيىن ارتتىرۋعا مۇمكىندىك بەرەدى. وسى جۇمىستار اياسىندا ءبىزدىڭ مەكەمە تاراپىنان باقىلاۋ مەن تەكسەرىس جۇمىستارى جالعاساتىن بولادى.
جولايرىقتاردىڭ ساپاسى مەن ۇزاق مەرزىمدىلىگى تۋرالى نە ايتار ەدىڭىز؟
2024 جىلى قۇلجا تاس جولى التى جولاققا كەڭەيتىلدى جانە سايىن-موڭكە بي جول ايرىعى بويىنشا قوزعالىس اشىلدى. بيىل، 2025 جىلى سەيفۋللين كوشەسى مەن جانسۇگىروۆ كوشەسىنىڭ قيىلىسىندا جاڭا كولىك جول ايرىعىن قولدانىسقا بەرۋ جوسپارلانعان. بۇل جول ايرىقتارىنىڭ ساپاسى تۋرالى ماماندارمەن 7 تەكسەرىس جۇرگىزىلىپ، 38 سىناما الىندى. بارلىق سىنامالار نورماتيۆتىك تالاپتارعا ساي بولدى. كوپىرلەردىڭ، وتكەلدەردىڭ، تۋننەلدەردىڭ جانە ەستاكادالاردىڭ كەپىلدىك مەرزىمى كەمىندە 5 جىلدى قۇرايدى.
2024 جىلى الماتى قالاسىندا جول جوندەۋ جۇمىستارىنىڭ ساپاسىن باقىلاۋ اياسىندا كوپتەگەن تەكسەرىستەر مەن سىناقتار جۇرگىزىلىپ، ناتيجەسىندە جول قۇرىلىس ماتەريالدارىنىڭ ساپاسىن جاقسارتۋ جانە مەردىگەرلەردىڭ جاۋاپكەرشىلىگىن ارتتىرۋ باعىتىندا ايتارلىقتاي جۇمىستار اتقارىلدى. بيىلعى جىلى قالادا تاعى دا اۋقىمدى جول جوندەۋ جۇمىستارىن باقىلاۋ جالعاسادى، بۇل قالاداعى جولداردىڭ ساپاسىن ودان ءارى جاقسارتۋعا ىقپال ەتەدى.