ماڭگىلىك الاۋعا گۇل شوقتارىن قويۋ ءراسىمى ءوتتى.
الماتىدا ۇلى وتان سوعىسىنداعى جەڭىستىڭ 78 جىلدىعى مەرەكەلەندى، دەپ حابارلايدى اlmaty-akshamy.kz.
ءداستۇر بويىنشا نەگىزگى مەرەكەلىك ءىس-شارالار 28 گۆاردياشى-پانفيلوۆشىلار اتىنداعى ساياباقتا ءوتتى، وندا الماتى اكىمى ەربولات دوسايەۆتىڭ قاتىسۋىمەن ماڭگىلىك الاۋعا گۇل شوقتارىن قويۋ ءراسىمى ءوتتى.
ۇلى وتان سوعىسىنىڭ ارداگەرلەرى، تىل ەڭبەككەرلەرى، اسكەري قىزمەتشىلەر، قۇقىق قورعاۋ ورگاندارىنىڭ وكىلدەرى، قوعام قايراتكەرلەرى مەن قالا تۇرعىندارى قازا تاپقان قازاقستاندىق جاۋىنگەرلەردى ەسكە الۋ ءۇشىن ءبىر مينۋت ۇنسىزدىكتەن كەيىن داڭق مەموريالىنا گۇل شوقتارىن قويدى.
ارداگەرلەردىڭ قۇرمەتىنە ارنالعان مەرەكەلىك تۇسكى اس كەزىندە اكىم مايدانگەرلەردى مەرەكەمەن قۇتتىقتاپ، ۇرىس الاڭىندا جانە ەڭبەك مايدانىندا كورسەتكەن ەرلىكتەرى ءۇشىن العىسىن ءبىلدىرىپ، زور دەنساۋلىق، باقىت پەن اماندىق تىلەدى.
ءوز كەزەگىندە ارداگەرلەر قالا باسشىلىعىنا نازار اۋدارعانى ءۇشىن العىس ايتىپ، الماتى تۇرعىندارى مەن بارلىق قازاقستاندىققا بەيبىتشىلىك پەن جاقسىلىق تىلەدى. سونىمەن قاتار، ولار ەستەلىكتەرىمەن ءبولىستى، ولەڭ وقىپ، مايدان اندەرىن ايتتى.
28 گۆاردياشى-پانفيلوۆشىلار اتىنداعى ساياباقتا اسكەري تەحنيكا كورمەسى ءوتتى، قالا تۇرعىندارى مەن قوناقتارى ءۇشىن دالالىق اس ءۇي ۇيىمداستىرىلدى، مەرەكەلىك كونسەرت قويىلىپ، قازاقستاندىق ارتىستەر مايدان اندەرى مەن سوعىستان كەيىنگى جىلدارداعى اندەردى ورىندادى.
بۇعان قوسا، الماتىدا ب.مومىش ۇلى مونۋمەنتىنە، ت.بيگەلدينوۆ، ر.قوشقاربايەۆ مەموريالدىق تاقتاسىنا، ءا.مولداعۇلوۆا مەن م.مامەتوۆا، س.نۇرماعامبەتوۆ ەسكەرتكىشتەرىنە، س.لۋگانسكييدىڭ بيۋستىنە، «وتان ۇلدارىنا ماڭگىلىك ەستەلىك» جانە «وتان ءۇشىن شايقاستا قازا تاپقاندارعا ماڭگىلىك داڭق» مەموريالدارىنا گۇل شوقتارىن قويۋ راسىمدەرى ءوتتى.
جەڭىس كۇنىن مەرەكەلەۋ ش. ءۋاليحانوۆ اتىنداعى سكۆەردە جانە جىبەك جولى-پانفيلوۆ كوشەلەرىنىڭ قيىلىسىندا دا ءوتتى. كونسەرتتە «الماتى اۋەندەرى» ارتىستەرى، اباي اتىنداعى قۇوبت سوليستەرى جانە باسقا دا مۋزىكالىق ۇجىمدار ونەر كورسەتتى.
مەكتەپتەر مەن كوللەدجدەردە اسكەري قىزمەتشىلەردىڭ، ارداگەرلەردىڭ قاتىسۋىمەن «ەرلىك ساباقتارى»، سونىمەن بىرگە بالالاردى ءار الۋان اسكەر تۇرلەرىمەن تانىستىرۋ بويىنشا ساباقتار جانە ت.ب. وتكىزىلدى.
سوعىس جىلدارى مايدانعا 1،3 ملن قازاقستاندىق شاقىرىلدى. قازاقستاننىڭ 100 مىڭنان استام ساربازى جاۋىنگەرلىك وردەندەرمەن جانە مەدالدارمەن ماراپاتتالدى، 500-دەن استام ادام كەڭەس وداعىنىڭ باتىرى اتاندى. ءقازىر الماتىدا ۇلى وتان سوعىسىنىڭ 56 ارداگەرى تۇرادى.
