جەلتوقسان وقيعاسىنىڭ 35 جىلدىعىنا وراي الماتى قالاسى اكىمدىگى قوعامدىق دامۋ باسقارماسىنىڭ تاپسىرىسىمەن «الماتى» تەلەارناسى دەرەكتى فيلم ءتۇسىردى
جەلتوقسان وقيعاسىنىڭ 35 جىلدىعىنا وراي الماتى قالاسى اكىمدىگى قوعامدىق دامۋ باسقارماسىنىڭ تاپسىرىسىمەن «الماتى» تەلەارناسى «جەلتوقسان – ەل تاۋەلسىزدىگىنىڭ باستاۋى» اتتى دەرەكتى فيلم ءتۇسىردى، دەپ حابارلايدى Almaty-akshamy.kz Almaty.tv-گە سىلتەمە جاساپ.
جەلتوقسان كوتەرىلىسىنىڭ 35 جىلدىعىن اتاپ ءوتۋ بويىنشا الماتى قالاسى اكىمدىگى قوعامدىق دامۋ باسقارماسىنىڭ باستاماسىمەن جىل باسىنان بەرى بىرنەشە ءىس-شارا وتكىزىلىپ، «الماتى» تەلەارناسىنىڭ عيماراتىندا جەلتوقسان كوتەرىلىسىنە قاتىسقان ازاماتتارمەن كەزدەسۋ ۇيىمداستىرىلدى.
كەزدەسۋگە جەلتوقسان ۇيىمدارىنىڭ جەتەكشىلەرى مەن مۇشەلەرى، تاريحشى-عالىمدار، تەلەارنانىڭ شىعارماشىلىق ۇجىمى قاتىسىپ، جەلتوقسان كوتەرىلىسىنىڭ 35 جىلدىعىنا بايلانىستى تۇسىرىلەتىن دەرەكتى فيلم، روليكتەر توپتاماسىنا ۇسىنىلاتىن سپيكەرلەر، تاريحشى-عالىمدار مەن زەرتتەۋشىلەر، ءتۇسىرىلىم لوكاسيالارى مەن ۋاقىتى بەلگىلەندى.
ءتۇسىرىلىم جۇمىستارىن ۇيىمداستىرۋ بارىسىندا «جەلتوقسان قوعامى» قوعامدىق بىرلەستىگىنىڭ ءتوراعاسى، «جەلتوقسان» كوتەرىلىسىنە قاتىسۋشى نۇرلىبەك قۋانبايەۆ، «جەلتوقسان – 86» قوعامدىق ۇيىمىنىڭ جەتەكشىسى گۇلباھرام ءجۇنىس جانە «جەلتوقسان كوتەرىلىسى» قوعامدىق بىرلەستىگىنىڭ ءتوراعاسى مىرزاعۇل ءتاجىعۇل ۇلى، «جەلتوقسان جالاۋى» قوعامدىق بىرلەستىگىنىڭ ءتورايىمى ءۇمىت بوسمانوۆا، «جەلتوقسان رۋحى» قوعامدىق بىرلەستىگىنىڭ ءتوراعاسى تالعات رىسقۇلبەك، «جەلتوقسان جۇلدىزدارى» قوعامدىق بىرلەستىگىنىڭ ءتورايىمى گۇلميرا بايات قىزى جانە باسقا دا ۇيىم جەتەكشىلەرى، مۇشەلەرىمەن رەداكتورلىق قۇرام بىرنەشە مارتە كەزدەستى. وندا جەلتوقسان كوتەرلىسىنە قاتىستى تاريحي تىڭ دەرەكتەر مەن بۇرىن-سوڭدى ايتىلماعان وقيعالار، بەينەقور مۇراعاتتارى مەن جەكە ارحيۆتەردەگى ماتەريالداردى پايدالانۋ بويىنشا سۇراقتار تالقىلاندى.
«الماتى» تەلەارناسىنىڭ باس ديرەكتورى، جۋرناليست نۇرجان مۇحامەدجانوۆانىڭ ايتۋىنشا، فيلم اياسىندا كوتەرىلىسكە قاتىسقان 60-قا جۋىق كەيىپكەر مەن تاريحشى-عالىمداردان سۇقبات الىنىپ، 30-عا جۋىق پىكىر جازىلعان. قالا اكىمى باقىتجان ءابدىر ۇلى ساعىنتايەۆتىڭ تاپسىرماسى بويىنشا، جەلتوقسان كوتەرىلىسىنىڭ 35 جىلدىعىنا وراي ۇيىمداستىرىلعان جانە باسقا دا مەملەكەتتىك دەڭگەيدە اتقارىلىپ جاتقان شارالاردان ازىرلەنگەن بەينەماتەريالدار توپتاستىرىلعان.
«الماتى قالاسى اكىمدىگى قوعامدىق دامۋ باسقارماسىنىڭ تاپسىرىسىمەن «جەلتوقسان – ەل تاۋەلسىزدىگىنىڭ باستاۋى» اتتى دەرەكتى فيلم ءتۇسىرۋ جوسپارلانعان بولاتىن. 5 ايعا جۋىق ۋاقىت ىشىندە «الماتى» تەلەارناسى «جەلتوقسان – ەل تاۋەلسىزدىگىنىڭ باستاۋى» اتتى 60 مينۋتتىق تەليەۆيزيالىق جوبا ازىرلەدى.
ءفيلمنىڭ رەجيسسەرى – اتلان بۋلىبايەۆ، رەداكتورى – ايدانا شالقاروۆا، پروديۋسەرى – ايگەرىم اسقارباي جانە باسقا دا شىعارماشىلىق ۇجىم مۇشەلەرى بار.
فيلم اياسىندا كوتەرىلىسكە قاتىسقان 60-قا جۋىق كەيىپكەر مەن تاريحشى-عالىمداردان سۇقبات الىنىپ، 30-عا جۋىق پىكىر جازىلدى. مارقۇم ءلاززات اسانوۆانىڭ اناسى التىناي اسانوۆادان تامىز ايىندا سۇقبات الىنعان بولاتىن. وكىنىشكە قاراي، التىناي اسانوۆا بىرنەشە اپتادان كەيىن باقيلىققا اتتاندى. فيلمدە بەلگىلى تاريحشى-عالىم تالاس وماربەكتىڭ دە پىكىرى ەنگىزىلگەن ەدى. وزدەرىڭىز بىلەسىزدەر، تالاس اعا دا جاقىندا ومىردەن وزدى...
جوبادا تاريحشى زەرتتەۋشىلەردىڭ دەرەكتەرى مەن جەلتوقسان قاھارماندارىنىڭ تاريحي ەستەلىگى بار»، – دەدى «الماتى» تەلەارناسىنىڭ باس ديرەكتورى، جۋرناليست نۇرجان مۇحامەدجانوۆا.