مەدەۋ اۋدانىنىڭ پروكۋراتۋراسىنا الماتى قالاسى مەديسينالىق-فارماسيەۆتيكالىق باقىلاۋ دەپارتامەنتىنىڭ زاڭسىز تەكسەرۋ ماسەلەسى بويىنشا جەكە كلينيكالاردىڭ ءبىرىنىڭ باسشىسى حابارلاسقان، دەپ حابارلايدى اlmaty-akshamy.kz.
«دەپارتامەنتكە مەديسينالىق ورتالىقتىڭ ارەكەتىنە قاتىستى ءوتىنىش كەلىپ تۇسكەن. وسى ءوتىنىش نەگىزىندە باقىلاۋ ورگانىنىڭ قىزمەتكەرى كاسىپكەرلىك سۋبەكتىسىن تىركەپ، تەكسەرۋ جۇرگىزدى. پروكۋراتۋرا ءوتىنىش بىلدىرگەن ازاماتتىڭ زاڭدى اتاۋى ۇقساس مۇلدە باسقا مەديسينالىق ۇيىمنىڭ ارەكەتىنە شاعىمدانعانىن انىقتادى. وسىعان قاراماستان مەديسينالىق ورتالىق زاڭسىز تەكسەرۋدەن ءوتتى»، —دەلىنگەن حابارلامادا.
مەملەكەتتىك ورگاننىڭ ارەكەتىنىڭ زاڭسىزدىعىن ەسكەرە وتىرىپ، تەكسەرۋ اكتىسى مەن ناتيجەلەرى جويىلدى.
سونىمەن بىرگە، جەكە كاسىپكەرلىك سۋبەكتىلەرىنە تەكسەرۋ جۇرگىزۋ ءتارتىبىن بۇزعانى ءۇشىن كىنالى لاۋازىمدى تۇلعا ق ر «اكىمشىلىك قۇقىق بۇزۋشىلىق تۋرالى» كودەكسىنىڭ 175 باپتىڭ 1-بولىگى بويىنشا اكىمشىلىك جاۋاپكەرشىلىككە تارتىلىپ، 20 اەك مولشەرىندە ايىپپۇل سالىندى.