الماتىداعى جەكەمەنشىك ەمحانالاردىڭ بىرىندە 55 جاستاعى ەر ادام قايتىس بولدى. مارقۇمنىڭ تۋىستارىنىڭ ايتۋىنشا، وتادان كەيىن ەر ادامدا انافيلاكتيكالىق شوك بولعان، دەپ حابارلايدى اlmaty-akshamy.kz قازاقپاراتقا سىلتەمە جاساپ.
قايعىلى وقيعا تۋرالى اقپارات الەۋمەتتىك جەلىدە تارادى.
جازبا اۆتورىنىڭ ايتۋىنشا، ەر ادامنىڭ ەكى ءتىسىن جۇلىپ، يمپلانت ورناتۋ كەرەك بولعان. الايدا مارقۇمنىڭ بالاسىنىڭ ايتۋىنشا، وتادان كەيىن اكەسىندە انافيلاكتيكالىق شوك بولعان.
«ەمحانا قىزمەتكەرلەرىنىڭ بىلىكتىلىگى تومەن، انافيلاكتيكالىق شوك كەزىندە العاشقى مەديسينالىق كومەك كورسەتپەگەن. ولار ادامدى قۇتقارۋعا بولاتىن قۇندى ۋاقىتتى جىبەرىپ الدى. دارىگەرلەر وعان شاي ءىشۋدى ۇسىنعان. اۋرۋحاناعا جەتكىزۋ كەزىندە "جەدەل جاردەمدە" ەشكىم ەرىپ جۇرمەگەن، تامىر سوعىسى توقتاپ قالعان. ول 55 جاستا، دەنى ساۋ، كوڭىلدى ادام ەدى.
حيرۋرگپەن، باس دارىگەرمەن سويلەسكەن كەزدە، ولاردىڭ حاتتامالاردى ورىندامايتىنى بەلگىلى بولدى: وتا جاساۋعا كەلىسىم الىپ، ناۋقاستارعا تالداۋ جاسامايدى، وپەراسيا الدىندا كارديوگرامما جاساپ، انەستەتيكتەرگە تەست المايدى. بارلىق كەلىسىم تەك ءسوز جۇزىندە. ەمحانا قىزمەتكەرلەرى قابىلەتسىز، ولاردىڭ سالعىرتتىعىنان اكەم قايتىس بولدى»، - دەلىنگەن جازبادا.
ەر ادام ورتالىق قالالىق كلينيكالىق اۋرۋحاناعا جەتكىزىلگەن.
مەديسينا مەكەمەسى باسپا ءسوز قىزمەتىنىڭ مالىمەتىنشە، اۋرۋحاناعا تۇسكەن كەزدە ناۋقاس كلينيكالىق ءولىم جاعدايىندا بولعان.
«ناۋقاس ورتالىق قالالىق كلينيكالىق اۋرۋحانانىڭ جەدەل جاردەم بولىمىنە كلينيكالىق ءولىم جاعدايىندا انافيلاكتيكالىق شوك دياگنوزىمەن ءتۇستى. پۋلس جوق، جۇرەك سوعىسى ەستىلمەدى. 30 مينۋت رەانيماسيا جۇرگىزىلدى، ءبىراق، وكىنىشكە قاراي، امان الىپ قالا المادىق. جۇرەك جۇمىسىن قالپىنا كەلتىرۋ مۇمكىن بولمادى»، - دەپ حابارلادى ورتالىق قالالىق كلينيكالىق اۋرۋحانانىڭ باسپا ءسوز قىزمەتى.