ەكولوگيالىق وزگەرىستەرگە بايلانىستى الماتىنىڭ جاسىل كەڭىستىگى ناشارلاعان.
بۇگىن الماتىدا مەگاپوليستىڭ باس جوسپارىن تالقىلاۋدىڭ ءۇشىنشى كۇنى ءوتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
جيىن بارىسىندا «ەكو الماتى» ج ش س ديرەكتورى، جاسىل كەڭىستىك بويىنشا ساراپشى اقبوتا مىرزالييەۆا الماتىدا كەيىنگى جىلدارى قالانىڭ جاسىل كەڭىستىگى ناشارلاپ كەتكەنىن ايتتى.
«سوڭعى جىلدارى الەم بويىنشا ەكولوگيالىق وزگەرىستەرگە بايلانىستى الماتىنىڭ جاسىل كەڭىستىگى ناشارلاعان. سونداي-اق، جاسىل كەڭىستىكتى كۇتىپ ۇستاۋداعى ءبىزدىڭ بۇرىنعى ءادىسىمىز ءوز ماڭىزدىلىعىن جويدى. وسىعان بايلانىستى جاڭا تەحنولوگيانى قولدانىپ، قالاعا جاۋىن-شاشىن مول جاۋاتىنىن ەسكەرۋىمىز قاجەت. ول بويىنشا ءقازىر باعدارلاما ازىرلەنۋ ۇستىندە. سول ارقىلى قالاعا تۇسەتىن مول جاۋىن-شاشىندى ءبىز جاسىل كەڭىستىكتەردى سۋعارۋ ءۇشىن دە پايدالاناتىن بولامىز»، - دەدى اقبوتا مىرزالييەۆا.
ونىڭ ايتۋىنشا، قازىرگى تاڭدا الماتىدا ارىق جۇيلەرىنىڭ تەك 11%-عانا جۇمىس ىستەپ تۇر.
«الماتىدا ءوزىنىڭ ارىق جۇيەسى بار. الايدا، بۇگىنگى كۇنى ونىڭ تەك 11%-ى عانا ىستەپ تۇر. دەگەنمەن، ءقازىر جاڭا ارىق جۇيەلەرىن، كانالدار، ماگيستارلدىق كانالداردى سالۋ، قايتا سالۋ جۇمىستارى جۇرگىزىلىپ جاتىر. مۇنىڭ ءبارى جاقسى، سەبەبى قالانىڭ جاسىل كەڭىستىگى ساپالى سۋعارۋعا بايلانىستى. مەن بۇگىنگى تالقىلاۋدا وسى ماسەلەلەر تالقىلانىپ، شەشىمىن تاۋىپ جاتقانىنا قۋانىشتىمىن»، - دەدى ساراپشى.
ول الماتىدا تۇرعىندار سانىنا قاراي جاسىل كەڭىستىك اۋماعى دۇرىس بولىنبەگەنىن ايتتى.
«بىرىككەن ۇلتتار ۇيىمىنىڭ ستاتيستيكاسى بويىنشا ءبىر ادامعا 30-50 شارشى مەتر جاسىل كەڭىستىك قاجەت. ءبىزدىڭ ەلىمىزدەگى نورمالار بويىنشا - ءبىر ادامعا 10 شارشى مەتر. دەگەنمەن، الماتىدا بۇل نورمالار ساقتالمايدى. سەبەبى، قالانىڭ ءار اۋدانىندا بۇل ساندار ءارتۇرلى. مىسالى، مەدەۋ اۋدانىندا ءبىر ادامعا 17 شارشى مەتر، الاتاۋ اۋدانىندا 5-7 شارشى مەتر دەپ ەسەپتەلەدى. دەمەك، بىزدە ءبىر ادامعا جاسىل كەڭستىكتەر دۇرىس بولىنبەگەن. مەنىڭشە، بۇل ماسەلەنى جاڭا ساياباق، سكۆەر، رەكرەاسيالىق اۋماقتاردى سالۋ، سۋ بۋلۆارى، سۋ قويماسى، وزەن ارنالارى، اۆتوجولداردىڭ بويىن اباتتاندىرۋ ارقىلى شەشە الامىز دەپ ويلايمىن»، - دەدى ول.
ەسكە سالايىق، الماتىدا قالانىڭ جاڭا باس جوسپارىن تالقىلاۋ 25 قاڭتاردا باستالعان بولاتىن. باستى ماقسات – قالانىڭ بارلىق اۋدانىندا جايلى ورتا قۇرۋ جانە ءومىر ءسۇرۋ ساپاسىن ارتتىرۋ بولدى.