الماتىدا قالا اكىمىنىڭ تاپسىرماسىمەن ستۋدەنتتەردى جاتاقحاناعا ورنالاستىرۋ بويىنشا شتاب قۇرىلدى
الماتى اكىمى ەربولات دوسايەۆ جاڭا وقۋ جىلىنا دايىندىق جانە ستۋدەنتتەردى جاتاقحاناعا ورنالاستىرۋ ماسەلەسى بويىنشا جوعارى وقۋ ورىندارىنىڭ رەكتورلارىمەن كەزدەستى، دەپ حابارلايدى aqshamnews.kz
«ەلىمىزدىڭ ماڭدايالدى وقۋ ورىندارىنىڭ دەنى الماتىدا ورنالاسقان، جىل سايىن مىڭداعان ستۋدەنت جوعارى ءبىلىم الۋ ءۇشىن وسىندا كەلەدى. ءبىزدىڭ مىندەتىمىز – ولارعا ساپالى ءبىلىم بەرۋ جانە جايلى جاتاقحانامەن قامتاماسىز ەتۋ»، – دەدى قالا اكىمى ەربولات دوسايەۆ.
شاھار باسشىسى جاتاقحانا ماسەلەسى تىكەلەي باقىلاۋىندا ەكەنىن اتاپ، الماتىعا وقۋعا كەلگەن ستۋدەنتتەردىڭ جاعدايىن جاساۋ بويىنشا قابىلدانىپ جاتقان شارالاردى تالقىلادى. سونىڭ ءبىرى الماتىلىق ستۋدەنتتەردى جاتاقحاناعا ورنالاستىرۋ ماسەلەسىمەن اينالىساتىن ارنايى شتابتىڭ قۇرىلۋى.
الماتى قالاسى اكىمدىگىنىڭ ستۋدەنتتەردى قولداۋعا ارنالعان تاعى ءبىر ماڭىزدى باستاماسى – داعدارىس جانە جەدەل دەن قويۋ جونىندەگى احۋالدىق ورتالىقتاردىڭ اشىلۋى.
داعدارىس ورتالىعى ALT ۋنيۆەرسيتەتىندە ورنالاسقان. داعدارىس ورتالىعىنىڭ مىندەتى باسقا وڭىردەن كەلگەن باسپاناسىز ستۋدەنتتەرگە جەدەل قولداۋ كورسەتۋ جانە ۋاقىتشا ورنالاستىرۋ. داعدارىس ورتالىعىندا 70 ورىن بار.
احۋالدىق ورتالىعى المالى اۋدانىنداعى جاستاردىڭ كوميۋنيتي ورتالىعىنىڭ بازاسىندا جۇمىس ىستەيدى. 1 تامىزدان باستاپ ورتالىق تاۋلىك بويى جۇمىس ىستەپ، ستۋدەنتتەرگە ورنالاستىرۋ ماسەلەسى بويىنشا جەدەل كومەك كورسەتۋدە. ورتالىق كۇن سايىن قازاقستاننىڭ تۇكپىر-تۇكپىرىنەن 1،5 مىڭنان استام قوڭىراۋ قابىلدايدى.
سونىمەن قاتار، قالانىڭ ءاربىر جوعارى وقۋ ورنىندا ستۋدەنتتەرگە تىكەلەي قولداۋ كورسەتەتىن احۋالدىق ورتالىقتار اشىلدى.
ايتا كەتەتىن نارسە، الماتىداعى 35 جوعارى وقۋ ورنىندا 199 مىڭنان استام ستۋدەنت ءبىلىم الىپ جاتىر، ونىڭ 124 مىڭى – وزگە وڭىردەن كەلگەن ستۋدەنتتەر. قالادا 109 ستۋدەنتتىك جاتاقحانا بار، وندا 36،2 مىڭنان استام ستۋدەنت تۇرادى. جالپى قاجەتتىلىك 28،7 مىڭ ورىن. الايدا قالا اكىمى قولداۋىمەن قابىلدانعان شارالاردىڭ ناتيجەسىندە تامىز ايىنىڭ سوڭىندا توسەك ورىن تاپشىلىعى 8،9 مىڭ ورىنعا دەيىن قىسقاردى.
وقۋ جىلى باستالعانعا دەيىن الماتىدا 1920 ورىندىق 6 جاتاقحانا اشىلادى، ال جىل سوڭىنا دەيىن الماتى قالاسى اكىمدىگىنىڭ جوبالىق كەڭسەسىنىڭ قولداۋىمەن 3105 ورىندىق 4 نىساندى پايدالانۋعا بەرۋ جوسپارلانىپ وتىر. 2024 جىلى جالپى 5025 ورىندىق 10 نىساندى، 2025-2026 جىلدارى 34 295 ورىندىق 33 نىساندى پايدالانۋعا بەرۋ كوزدەلگەن.
ەستەرىڭىزگە سالا كەتەيىك، جاتاقحانا قۇرىلىسىن ءتيىمدى ۇيلەستىرۋ ءۇشىن ستۋدەنتتىك جاتاقحانالار قۇرىلىسى بويىنشا جوبالىق كەڭسە جۇمىس ىستەپ تۇر. جوبالىق كەڭسەنىڭ نەگىزگى مىندەتى الماتى قالاسىندا جاتاقحانالار قۇرىلىسى بويىنشا مەملەكەتتىك باعدارلامانى ىسكە اسىرۋ جانە ستۋدەنتتەردى تۇرعىن ۇيمەن قامتاماسىز ەتۋ ءۇشىن قولايلى جاعداي جاساۋ. جوبالىق كەڭسە اشىلعاننان باستاپ 120 الەۋەتتى ينۆەستور جۇگىندى، ونىڭ 67ء-سى ءقازىر جۇمىسقا كىرىسكەن، بۇل قولداۋ مەحانيزمىنىڭ تارتىمدىلىعىن كورسەتەدى.
انىقتاما ءۇشىن:
+77002551443، +77009509528 جاتاقحانا ماسەلەسى بويىنشا جەدەل دەن قويۋ جونىندەگى احۋالدىق ورتالىق؛ +77015282837 – ستۋدەنتتىك جاتاقحانا قۇرىلىسى بويىنشا جوبالىق كەڭسەنىڭ باسشىسى دامير كۋتۋموۆ.