الماتىدا «جاسىل ەل» جاساقتارىنىڭ ەڭبەك ماۋسىمىنىڭ جابىلۋ سالتاناتى ءوتتى، دەپ حابارلايدى aqshamnews.kz
بيىلعى ماۋسىمنىڭ قورىتىندىسى بويىنشا 2100 جاس ۋاقىتشا جۇمىسپەن قامتىلىپ، قالا اۋماعىندا ءارتۇرلى ەكولوگيالىق شارالارعا قاتىستى. جوبا الماتى قالاسى جاستار ساياساتى باسقارماسىنىڭ قولداۋىمەن جۇزەگە استى.
«پرەزيدەنتىمىز قاسىم-جومارت توقايەۆتىڭ باستاماسىمەن ەلىمىزدە «تازا قازاقستان» جالپىۇلتتىق اكسياسى وتۋدە. وسى اكسيا اياسىندا «جاسىل ەل 2024» ەڭبەك جاساقتارى ءوز جۇمىسىن ابىرويمەن اتقاردى دەپ ايتا الامىز. جوبا اياسىندا الماتى قالاسىنىڭ جوو مەن كوللەدجدەرىنىڭ 2100 ستۋدەنتىن ۋاقىتشا جۇمىسپەن قامتىدىق. كەلەسى جىلى بۇدان دا كوپ جاستى جۇمىسپەن قامتيمىز دەگەن ويدامىز. ايتا كەتەيىن، الماتى جاستارى جىل بويى قالامىزدى كوركەيتۋگە باعىتتالعان ءتۇرلى ەكو-شارالارعا قاتىسادى جانە جىل سايىن ولاردىڭ سانى ءوسىپ كەلەدى»، - دەدى ءوز سوزىندە الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.
«جاسىل ەل» جاساقتارى 3 اي بويى الماتىنىڭ بارلىق اۋداندارىندا تازالىق جۇمىستارىن جۇرگىزدى. ولار كوشەلەر مەن ساياباقتاردى تازالاپ، اعاشتار وتىرعىزىپ، تابيعاتتى قورعاۋ شارالارىنا بەلسەنە ارالاستى. ۇيىمداستىرۋشىلاردىڭ ايتۋىنشا، مۇنداي شارالار تەك قالا تابيعاتىن جاقسارتۋعا عانا ەمەس، سونىمەن قاتار جاس بۋىننىڭ ەكولوگيالىق جاۋاپكەرشىلىگىن ارتتىرۋعا مۇمكىندىك بەرەدى.
شارا بارىسىندا ماۋسىمدا ۇزدىك دەپ تانىلعان 20 ستۋدەنتكە Smart تەلەديدارلار مەن ەلەكتر ساموكاتتار سىيعا تارتىلدى.
سالتاناتتى جيىن ەسترادا جۇلدىزدارىنىڭ قاتىسۋىمەن كونسەرتتىك باعدارلامامەن جالعاستى.