الماتى قالاسى جاستار ساياساتى باسقارماسى جاستاردىڭ جۇمىس ىزدەۋىنە ارنالعان Jobfair365 ءبىرىڭعاي پلاتفورماسىن ىسكە قوستى. قىزمەتتەر ءتىزىمىن https://jasalmaty.kz/ سايتىنان كورۋگە بولادى، دەپ حابارلايدى Almaty-akshamy.kz.
باعدارلاما ءۇش اسپەكتىنى قامتيدى - جاستارعا ءوز ماماندىعى بويىنشا جۇمىس تابۋعا كومەكتەسەتىن جۇمىسقا ورنالاستىرۋ قىزمەتى، ءبىلىم بەرۋ باعدارلامالارىنا قول جەتكىزۋدى قامتاماسىز ەتەتىن تەگىن كۋرستار قىزمەتى جانە قالامىزدىڭ جاستارىنا ارنالعان اقپاراتتىق پورتال.
سونىمەن قاتار، سايتتا سەرتيفيكات بەرەتىن ورىس جانە قازاق تىلدەرىندەگى قىسقا مەرزىمدى كۋرستار بار.
قىسقا مەرزىمدى كۋرستاردىڭ ءتىزىمىن انىقتاۋ ءۇشىن ەڭبەك نارىعىنداعى سۇرانىسقا تالداۋ جۇرگىزىلدى. تالداۋ جاستاردى تابىستى جۇمىسقا ورنالاستىرۋ ءۇشىن قاجەتتى وزەكتى ءارى سۇرانىسقا يە ماماندىقتاردى انىقتاۋعا مۇمكىندىك بەردى. وسىلايشا، كۋرستار اقپاراتتىق تەحنولوگيا، سيفرلىق ماركەتينگ، قارجى، بۋحگالتەرلىك ەسەپ، جوبانى باسقارۋ، كاسىپكەرلىك، ديزاين، ساتۋ مەنەدجەرى، SMM مەنەدجەرى، موبيلوگراف، گرافيكالىق ديزاينەر، تارگەتولوگ، تۋروپەراتور، گيد، كۋرەر، حاۋسكيپەر جانە ت.ب. سالالاردى قامتيدى.
كۋرستىڭ باعىتىنا بايلانىستى ساباق 20-دان 30-عا ادامعا دەيىنگى توپقا وتكىزىلەدى. پايدالانۋشىلار اپتاسىنا 3 رەت 2-3 ساعات وقيدى، وندا وقىتۋدىڭ تەوريالىق بولىگى 1 ايدان 1،5 ايعا دەيىن سوزىلادى.
قازىرگى ۋاقىتتا پورتالدا 3،7 مىڭ بوس جۇمىس ورنى بار جانە 20 وڭىردەن 1،5 مىڭ جۇمىس بەرۋشى تىركەلگەن. بۇگىندە 10،2 مىڭ ادام وقىتىلدى، ونىڭ 9،2 مىڭى جۇمىسقا ورنالاستىرىلدى.