اۋىرعانداردىڭ 44،4%-ى قىزىلشامەن اۋىراتىن ناۋقاسپەن بايلانىستا بولعان
الماتىدا 3 ناۋرىزدان باستاپ قىزىلشانىڭ 18 زەرتحانالىق راستالعان جاعدايى تىركەلدى. ونىڭ ىشىندە 14 جاسقا دەيىنگى بالالار اراسىندا - 17، 40 جاستان اسقان ەرەسەكتەر اراسىندا - 1 جاعداي، دەپ حابارلايدى Almaty-akshamy.kz.
الماتى قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتى ءمالىم ەتكەندەي، سوڭعى ەكى جىلدا (2021، 2022 جج.) الماتى قالاسى بويىنشا قىزىلشا مەن قىزامىقتىڭ زەرتحانالىق راستالعان جاعدايلارى تىركەلمەگەن. الايدا، كوشى-قون فاكتورى (باسقا ەلدەردەن حالىقتىڭ كوشىپ كەلۋى، قازاقستاندىقتاردىڭ باسقا ەلدەرگە كەتۋى) الماتىداعى ەپيدەميولوگيالىق جاعدايعا اسەر ەتىپ وتىر.
«سىرقاتتانۋشىلىق نەگىزىنەن قىزىلشاعا قارسى ەگىلمەگەن بالالار اراسىندا، ونىڭ ىشىندە ۆاكسينالاۋدان باس تارتۋ، مەديسينالىق قارسى كورسەتىلىمنىڭ بولۋى، ياعني، ەگۋ جاسىنا 12-15 ايعا جەتپەگەندىكتەن تىركەلدى. اۋىرعانداردىڭ 44،4%-ى (زەرتحانالىق راستالعان جاعداي) قىزىلشامەن اۋىراتىن ناۋقاسپەن بايلانىستا بولعانىن، سونداي-اق، ينكۋباسيالىق كەزەڭدە قازاقستاننان تىس جەردە بولعاندارىن ايتتى. ناۋقاستاردىڭ قۇرىلىمى بويىنشا 44،4% - ۇيىمداسپاعان بالالار، 22،2% – مەكتەپكە دەيىنگى مەكەمەلەرگە باراتىن ۇيىمداسقان بالالار، 22،2% – مەكتەپ وقۋشىلارى، 5،6% – ءبىلىم بەرۋ ورتالىقتارىنا باراتىن بالالار»، - دەپ حابارلادى دەپارتامەنتتەن.
قىزمەت ماماندارى مەديسينالىق ۇيىمدارمەن بىرلەسىپ بارلىق وشاقتاردا ەپيدەمياعا قارسى ءىس-شارالار جۇرگىزدى. ناۋقاسپەن بايلانىسقا تۇسكەن بارلىعى 813 ادام انىقتالدى، ونىڭ ىشىندە 477 ەرەسەك، 14 جاسقا دەيىنگى 333 بالا، 3 ءجاسوسپىرىم بار. 63 ادام قىزىلشاعا قارسى ۆاكسينالانباعان. قالعاندار قىزىلشامەن اۋىراتىن ناۋقاسپەن بايلانىستا بولعان ساتتەن باستاپ 72 ساعات وتكەن سوڭ جانە جاسى 30 جاستان اسقاندىقتان، مەديسينالىق قارسى كورسەتىلىم بويىنشا شۇعىل ۆاكسينالاۋعا جاتپايدى. بارلىق بايلانىسقا تۇسكەندەر مەديسينالىق باقىلاۋعا الىنىپ، قىزىلشانىڭ الدىن الۋ شارالارى تۋرالى ءتۇسىندىرۋ جۇمىستارى جۇرگىزىلدى.
ايتا كەتەيىك، قىزىلشا – بۇل اۋا-تامشىلى ينفەكسيالار توبىنا جاتاتىن جەدەل جۇقپالى ۆيرۋستىق اۋرۋ. اۋرۋ ادامنان ادامعا اۋا ارقىلى، تىنىس الۋ جولدارىنىڭ تامشىلارىمەن نەمەسە اۋرۋ جۇقتىرعان ادامنىڭ مۇرنى نەمەسە تاماق بولىنىسىنەن جۇعادى.
قىزىلشا – ەڭ جۇقپالى ينفەكسيانىڭ ءبىرى، سەبەبى، اۋىراتىن اداممەن بايلانىسقا تۇسكەن سوڭ ەكپە الماعان ادامداردىڭ 90%-دان استامى اۋىرادى.
الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى قىزىلشانى جۇقتىرۋدان، سونداي-اق، ولاردىڭ اسقىنۋىنان ساقتانۋدىڭ جالعىز جولى - ۆاكسينا الۋ ەكەندىگىن ەسكە سالدى.