الماتى قالاسىندا جىل باسىنان بەرى جاسوسپىرىمدەر اراسىنداعى قىلمىس 21،7 %-عا تومەندەگەن
الماتىدا جاسوسپىرىمدەر اراسىندا جاسالعان 40 قىلمىس تىركەلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«تالداۋ كورسەتكەندەي، 40 قىلمىستىڭ 38ء-ىن باسقا قالالاردان كەلگەن جاسوسپىرىمدەر جاساعان. اتاپ ايتقاندا، الماتى وبلىسى – 22، جامبىل وبلىسى – 9، قوستاناي وبلىسى – 3، شىعىس قازاقستان وبلىسى – 1، تۇركىستان وبلىسى – 2، نۇر-سۇلتان قالاسىنىڭ تۇرعىندارى – 1. كامەلەتكە تولماعاندار جاساعان قىلمىستاردىڭ ەڭ كوپ بولىگى – مۇلىكتىك قۇقىق بۇزۋشىلىقتار. بۇل – ۇرلىق، توناۋ جانە بوتەن كولىكتەردى ايداپ اكەتۋ»، – دەپ حابارلادى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى ماناپ ساتتاروۆ.
كامەلەتكە تولماعاندار اراسىنداعى قۇقىق بۇزۋشىلىقتىڭ الدىن الۋ ماقساتىندا مۇددەلى مەملەكەتتىك ورگاندار مەن جۇرتشىلىقتىڭ قاتىسۋىمەن جالپىقالالىق 12 جەدەل الدىن الۋ ءىس-شاراسى وتكىزىلدى.
«قابىلدانعان ءىس-شارالاردىڭ ناتيجەسىندە ءىىو-عا ءتۇرلى قۇقىق بۇزۋشىلىق جاساعانى ءۇشىن 9 596 ادام جەتكىزىلدى، ونىڭ ىشىندە 9 348ء-ى اكىمشىلىك قۇقىق بۇزۋشىلىق ءۇشىن. 470 ءجاسوسپىرىم، سونداي-اق 429 تۇرمىسى ناشار وتباسى انىقتالىپ، ەسەپكە الىندى. قيىن ومىرلىك جاعدايداعى بالالاردى قولداۋ ورتالىعىنا 463 بالا ورنالاستىرىلدى. كامەلەتكە تولماعانداردىڭ تۇنگى ۋاقىتتا زاڭدى وكىلدەرىنسىز ويىن-ساۋىق مەكەمەلەرىندە جانە تۇرعىن ۇيلەردەن تىس جەردە جۇرگەنى ءۇشىن 5 005 اتا-انا اكىمشىلىك جاۋاپكەرشىلىككە تارتىلدى»، – دەپ قورىتىندىلادى ساتتاروۆ.