الماتىدا جاپپاي تارتىپسىزدىك كەزىندە ارماتۋرا تاراتقاندار ۇستالدى

ولار قاماۋعا الىندى.

الماتىدا جاپپاي تارتىپسىزدىككە قاتىسۋشىلارعا ارماتۋرا تاراتقان ەر ادامدار ۇستالدى، دەپ حابارلايدى Almaty-akshamy.kz Polisia.kz سايتىنا سىلتەمە جاساپ.

الماتى قالالىق پد ەكسترەميزمگە قارسى كۇرەس باسقارماسىنىڭ مالىمەتىنشە، 20 مەن 24 جاس ارالىعىنداعى التى ەر ادام ۇستالعان.

«5 قاڭتارعا قاراعان ءتۇنى «شاڭىراق» ىقشاماۋدانىنداعى ۇيلەردىڭ بىرىندە بولگاركانىڭ كومەگىمەن تەمىر ارماتۋرانىڭ بولىكتەرىن (70 سم) دايىنداپ، كەلەسى كۇنى جاپپاي تارتىپسىزدىكتىڭ قاتىسۋشىلارىنا تاراتقاندىعى انىقتالدى. ايتپاقشى، كەزدەيسوق كۋاگەرلەر بۇل ىس-ارەكەتتى ۇيالى تەلەفوننىڭ كامەراسىنا ءتۇسىرىپ العان. بەينەجازبادان ادامداردىڭ گازەل جۇك شاناعىنان ارماتۋرانى «ءتۇسىرىپ» جاتقانىن كورۋگە بولادى. ىس-ارەكەت تولە بي داڭعىلىنىڭ بويىندا شىعىس باعىتتا ورىن الدى. زاڭسىز ارەكەتتەرگە قاتىسۋشىلار انىقتالدى جانە ۇستالدى. ولار ءتارتىپ ساقشىلاردىڭ دەنساۋلىعىنا زاقىم كەلتىرۋ ماقساتىندا تارتىپسىزدىككە قاتىسۋشىلارعا تاراتۋ ءۇشىن ءتۇنى بويى قاساقانا تەمىر ارماتۋرالار دايىنداعانىن مويىندادى، – دەدى الماتى قالالىق پوليسيا دەپارتامەنتى باستىعىنىڭ ورىنباسارى بەرىك ابىلبەكوۆ.

ۇستالعاندارعا ق ر قك-نىڭ 272-بابى 2-بولىگى بويىنشا جاپپاي تارتىپسىزدىككە قاتىستى دەگەن ايىپ تاعىلىپ وتىر. ولار قاماۋعا الىندى.