زاۋىت اۆتوكولىكتەرگە ارنالعان قازاق ءتىلى ينتەگراسيالانعان مۋلتيمەديالىق جۇيەلەر شىعاراتىن بولادى
الماتىدا Kazakhstan Mobility Engineering كومپانياسى قازاق ءتىلى ينتەگراسيالانعان اۆتوكولىكتەرگە ارنالعان مۋلتيمەديالىق جۇيەلەر شىعاراتىن جاڭا زاۋىت اشتى. كاسىپورىن وڭتۇستىك كورەيانىڭ Motrex Co Ltd سەرىكتەسىنىڭ تەحنولوگياسىن قولدانادى.
جاڭا ءوندىرىس مەملەكەت باسشىسىنىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا بەلگىلەنگەن ماقساتتارعا سايكەس كەلەدى. ونەركاسىپتىك الەۋەتتى تولىق اشۋ ءۇشىن وتاندىق شيكىزات پەن كومپونەنتتەردى پايدالانۋدى قوسا العاندا، جۇيەلى كوزقاراس قاجەت. اۆتوونەركاسىپتىڭ ءوسۋى قازاقستاننىڭ ونەركاسىپتىك ساياساتىنىڭ نەگىزگى باعىتتارىنىڭ بىرىنە اينالىپ وتىر، سوندىقتان وندىرىستىك ۇدەرىستەردى لوكاليزاسيالاۋ مەن تەرەڭدەتۋدى بىرلەسىپ دامىتۋ ماڭىزدى. زاۋىتتىڭ ىسكە قوسىلۋى — جوعارى دەڭگەيدە قايتا وڭدەۋدى مەڭگەرۋ جانە ءىرى ونەركاسىپتىك نىسانداردىڭ اينالاسىندا ىرگەلەس وندىرىستەردى دامىتۋ قادامدارىنىڭ ءبىرى. كاسىپورىن «استانا موتورس» كومپانياسىنىڭ قۇرامىنا كىرەدى.
«مۋلتيمەديالىق جۇيەلەر – بۇل جوعارى دالدىكتى تالاپ ەتەتىن ءوندىرىس، ول سيفرلىق تەحنولوگيالار مەن ينجەنەريا سالاسىنداعى ءبىرىنشى دارەجەلى مامانداردىڭ قۇزىرەتىن قاجەت ەتەدى. ءبىزدىڭ باستى ماقساتىمىز – لوكاليزاسيانىڭ جوعارى ۇلەسى بار ءوندىرىس سيكلىن قۇرۋ. ءبىز وتاندىق شيكىزات پەن كومپونەنتتەردى بارىنشا قولدانۋعا تىرىسامىز. سوندىقتان Kazakhstan Mobility Engineering ەلىمىز ءۇشىن ەرەكشە مانگە يە»، — دەدى ونەركاسىپ جانە قۇرىلىس ءمينيسترى قانات شارلاپايەۆ زاۋىتتىڭ اشىلۋ سالتاناتىندا.
ۇكىمەت وتاندىق وندىرۋشىلەردى قولداۋ ماقساتىندا كەشەندى شارالار قابىلداۋدا. مەملەكەت باسشىسىنىڭ تاپسىرماسىنا سايكەس، اۆتوكولىك وندىرىسىندە كلاستەرلىك ءوندىرىستى دامىتۋ بويىنشا جۇمىستار جۇرگىزىلىپ جاتىر، بۇل سالانىڭ تۇراقتى وسۋىنە جانە سىرتقى نارىقتارداعى ءونىمنىڭ باسەكەگە قابىلەتتىلىگىن ارتتىرۋعا ىقپال ەتپەك. سونىمەن قاتار، بيىل اۋىل شارۋاشىلىعى ماشينالارىن جاساۋدا يمپورتتىق بالامالاردى سۋبسيديالاۋ توقتاتىلدى، ال تەحنيكا ليزينگىنىڭ پايىزدىق مولشەرلەمەسىن سۋبسيديالاۋ كەزىندە وتاندىق ونىمگە تومەندەتىلگەن مولشەرلەمە بەلگىلەندى. تەمىرجول تەحنيكاسىن ءوندىرۋ سەكتورىندا قولجەتىمدى ليزينگتىك قارجىلاندىرۋ مەحانيزمى ىسكە قوسىلدى، ناتيجەسىندە 2024 جىلى ءوندىرىس كولەمى 1،5 ەسەگە ارتتى.
Kazakhstan Mobility Engineering زاۋىتى الماتىنىڭ يندۋستريالدى ايماعىندا ورنالاسقان. كاسىپورىن 100 مىڭ شارشى مەتر اۋماقتا اۆتوكولىك بولشەكتەرىن شىعاراتىن ءىرى تەحنوپاركتىڭ قۇرامىنا كىرەدى. بۇل جوبا ءوندىرىستى لوكاليزاسيالاۋعا جانە قازاقستاندىق اۆتوونەركاسىپتى قولداۋعا باعىتتالعان. سونىمەن قاتار، الماتى يندۋستريالدى ايماعىندا اۆتوكرەسلولار، اۆتوكولىكتەرگە ارنالعان رەزەڭكە جانە پلاستيك بۇيىمدارىن شىعاراتىن زاۋىتتار مەن لوگيستيكالىق حابتى ىسكە قوسۋ جوسپارلانىپ وتىر. بارلىق تەحنوپاركتىڭ تەحنيكالىق وندىرىستىك قۋاتى جىلىنا شامامەن 100 مىڭ جيىنتىقتى قۇرايدى. كلاستەر اۋماعىندا 90-نان استام مامان جۇمىس ىستەسە، ال بۇكىل وندىرىستىك كەشەندە شامامەن 400 قىزمەتكەر جۇمىس ىستەيدى دەپ كۇتىلۋدە.