الماتىداعى بالالارعا شۇعىل مەديسينالىق كومەك كورسەتۋ ورتالىعىنىڭ بازاسىندا جاڭا تۋعان نارەستەلەردى جانساقتاۋ جاعدايىندا كۇتىپ-باپتاۋعا ارنالعان مامانداندىرىلعان بولىمشە اشىلدى. بۇل تۋرالى ورتالىق ديرەكتورى الىبەك سماعۇلوۆ 2025 جىلدىڭ جۇمىس قورىتىندىسى تانىستىرىلىمىندا مالىمدەدى. ءىس-شاراعا قالالىق قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆ قاتىستى.
ونىڭ ايتۋىنشا، 2025 جىلى قىركۇيەكتەن باستاپ جۇمىس ىستەپ كەلە جاتقان بولىمشە 16 ورىنعا ارنالعان. مۇندا شۇعىل تۇردە تۇسكەن نارەستەلەرگە كومەك كورسەتىلەدى، سونداي-اق جانساقتاۋدان كەيىنگى بالالارعا قارقىندى تەراپيا جانە ەرتە وڭالتۋ قىزمەتتەرى قاراستىرىلعان. ءۇش ايدىڭ ىشىندە 103 جاڭا تۋعان نارەستەگە مەديسينالىق كومەك كورسەتىلدى.
ءبىر جىلدا ورتالىقتا 235 نارەستە ەمدەلىپ، ولاردىڭ 52-سىنە تۋا بىتكەن دامۋ اقاۋىنا بايلانىستى شۇعىل وتا جاسالدى. پاسيەنتتەر سانىنىڭ ءوسۋى بولىمشەنىڭ مۇمكىندىكتەرىن كەڭەيتۋگە جانە جاڭا ورىنداردى اشۋعا نەگىز بولدى.
2025 جىلدان باستاپ ورتالىقتا 0-دەن 18 جاسقا دەيىنگى بالالارعا ارنالعان 12 ورىندىق وتورينولارينگولوگيا جانە جاق-بەت حيرۋرگياسى بولىمشەسى تاۋلىك بويى قىزمەت كورسەتەدى. العاشقى بەس ايدا 83 بالاعا شۇعىل جانە جوسپارلى كومەك كورسەتىلدى. جاڭا بولىمشەلەردىڭ اشىلۋى كورسەتىلەتىن مەديسينالىق كومەكتىڭ اياسىن كەڭەيتۋگە مۇمكىندىك بەردى.
وتكەن جىلى 140،6 مىڭنان استام بالا مەديسينالىق كومەك الدى، بۇل 2024 جىلمەن سالىستىرعاندا 22،5%-عا كوپ. جوسپارلى تارتىپتە قازاقستاننىڭ ءتۇرلى وڭىرلەرىنەن كەلگەن 1 500-دەن استام ناۋقاسقا مامانداندىرىلعان حيرۋرگيالىق جانە كونسەرۆاتيۆتى كومەك كورسەتىلدى.
2025 جىلى ورتالىقتا دارىلىك زاتتار مەن مەديسينالىق بۇيىمداردى ەسەپكە الۋدى قامتاماسىز ەتەتىن گوسپيتالدىق فارماسيا بولىمشەسى دە اشىلىپ، حالىقارالىق GPP ستاندارتىنا ساي سەرتيفيكات الدى.
جىل قورىتىندىسى بويىنشا ورتالىق ەڭ جوعارى اككرەديتاسيالىق سانات يەلەنىپ، قازاقستاندا «جىلدىڭ ۇزدىك بالالار ستاسيونارى» دەپ تانىلدى.