قىستا ەگىلەتىن بۇل قاراعاي اعاشى بىرەر جىلدا قالامىزدىڭ ءسانى بولماق
الماتىلىقتار جاڭا جىلدى ساۋاپتى ىسپەن باستادى. بۇگىن الاتاۋ اۋدانىنداعى ساياباققا جاسىل ەكونوميكا باسقارماسى جانە الاتاۋ اۋدانى اكىمدىگىنىڭ قولداۋىمەن 40-قا جۋىق قاراعاي اعاشى وتىرعىزىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
قىستا ەگىلەتىن بۇل قاراعاي اعاشى بىرەر جىلدا قالامىزدىڭ ءسانى بولماق. بۇل باستاماعا قالا تۇرعىندارى مەن قوعام بەلسەندىلەرى دە قاتىستى.
«بۇگىن الاتاۋ اۋدانىندا 38 قاراعاي وتىرعىزدىق. شاراعا جاسىل ەكونوميكا باسقارماسى مەن الاتاۋ اۋدانى اكىمدىگى جانە ەكوبەلسەندىلەر قاتىستى»، – دەيدى «تابيعات» ەكولوگيالىق وداعى ءتوراعاسىنىڭ ورىنباسارى تيمۋر ەلەۋسىزوۆ.
كۇننىڭ سۋىعىنا قاراماستان، مۇنداي يگى باستامانى قولداپ كەلگەندەردىڭ قاراسى قالىڭ بولدى.
«شامامەن اعاش وتىرعىزۋعا 60 ادام اتسالىستى. ءبىزدىڭ باستى ماقساتىمىز – اۋا ساپاسىن جاقسارتىپ، تابيعاتتى قورعاۋ. بۇل دۇنيەنىڭ ءبارى بالالارىمىزدىڭ بولاشاعى ءۇشىن جاسالىپ جاتقان دۇنيە»، – دەيدى «تابيعات» ەكولوگيالىق وداعى ءتوراعاسىنىڭ ورىنباسارى.
سونداي-اق تيمۋر ەلەۋسىزوۆ قازاقستاندىقتاردى جاڭا جىل مەرەكەسىمەن قۇتتىقتادى.
«مەن قازاقستاندىقتاردى كەلىپ جەتكەن جاڭا جىل مەرەكەسىمەن قۇتتىقتايمىن. ءاربىر ادامعا ايتارىم، ەلىڭىزدى ءسۇيىڭىز! ءبىر ماقساتقا جەتۋ ءۇشىن ەشقاشان كەرى شەگىنۋگە بولمايدى. ءاربىر ءىستىڭ قايىرى بولادى. ءبىزدىڭ اتقارىپ جاتقان جۇمىسىمىزدىڭ ءبارى كەلەر ۇرپاققا پايداسىن تيگىزەرى ءسوزسىز»، – دەدى ول.
ايتا كەتەيىك، بۇل ءىس-شارا وسىمەن ءۇشىنشى رەت ءداستۇرلى تۇردە وتكىزىلىپ كەلەدى.