الماتىدا جالعىزباستى ايەلدىڭ ۇيىنە قاراقشىلىق شابۋىل جاسالدى

الماتىدا جەكە ۇيگە قاراقشىلىق شابۋىل جاسالدى

قاراقشىلىق شابۋىل تۇنگى ساعات ءۇش شاماسىندا ورىن العان. قايسەنوۆ كوشەسىندەگى ۇيلەردىڭ بىرىنە ءۇش ادام باسىپ كىرگەن، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«بەلگىلى بولعانداي، ولار الدىن الا بەلگىلەنگەن جوسپار بويىنشا ارەكەت ەتكەن. شابۋىل جاساعاندار ۇيدە جالعىزباستى ايەلدىڭ تۇراتىنىن بىلگەن. كۇدىكتىلەردىڭ رولدەرى ناقتى بولىنگەن: ەكەۋى قىلمىستىق نيەتتەرىن جۇزەگە اسىردى، بىرەۋى جاعدايدى باقىلاۋ ءۇشىن قاقپانىڭ جانىندا قالدى. قاسكويلەر ءۇي يەسىن سوققىعا جىققان. ولار وزدەرىمەن بىرگە قۇنى 2 ميلليون تەڭگەدەن اساتىن زەرگەرلىك بۇيىمداردى الىپ كەتكەن. اۋىر قىلمىستى اشۋ ماقساتىندا قالالىق كريمينالدىق پوليسيا قىزمەتكەرلەرىمەن كۇشەيتىلگەن جەدەل-ىزدەستىرۋ توبى قۇرىلدى. قاراقشىلىق شابۋىل اشىلدى. ءۇش كۇدىكتىنىڭ ەكەۋى ۇستالدى. قاشقىندى قولعا ءتۇسىرۋ ۋاقىت ەنشىسىندە. 37 جاستاعى ج. ەسىمدى ازامات، سونىمەن قاتار 25 جاستاعى س. ەسىمدى ازامات قاماۋعا الىندى. ايتپاقشى، ەكەۋى دە بۇرىن بوتەننىڭ مۇلكىن ۇرلاعانى ءۇشىن جازاسىن وتەگەن»، – دەدى مەدەۋ اۋداندىق پوليسيا باسقارماسىنىڭ باستىعى داۋرەن وتەبايەۆ.

ۇستالعانداردىڭ ايتۋىنشا، ولار شابۋىل جاساماس بۇرىن ءۇيدى بىرنەشە كۇن باقىلاعان. ولاردىڭ ولجاسى ءوزارا ءبولىسىپ العان اسىل تاستار بولدى. كەيبىرەۋىن ساتقان، ال تۇسكەن اقشانى ءوز قالاۋلارى بويىنشا جۇمساعان.