ءىىم اۆتوكولىكتى جالعان قۇجاتتار بويىنشا تىركەگەن قىلمىستىق توپتاردى ۇستادى
ءىىم ۇيىمداسقان قىلمىسقا قارسى كۇرەس بولىنىستەرى شەتەلدەن اكەلىنگەن اۆتوكولىكتەردى زاڭسىز تىركەۋمەن اينالىسقان قىلمىستىق توپتاردىڭ جولىن كەسۋ جانە ولاردى ۇستاۋ بويىنشا جەدەل-تەرگەۋ ءىس-شارالارىن جۇرگىزدى، – دەپ حابارلايدى almaty-akshamy.kz Polisia.kz. سىلتەمە جاساپ.
ماسەلەن، اقمولا وبلىسىندا تىركەۋگە زاڭسىز قويىلعان جۇك اۆتوكولىكتەرى انىقتالدى. وتكەن جىلدىڭ اقپان ايىنان اعىمداعى جىلدىڭ ءساۋىر ايىنا دەيىن قىلمىستىق توپ العاشقى مەملەكەتتىك تىركەۋ الىمىن تولەگەنى تۋرالى جالعان قۇجاتتاردى پايدالانا وتىرىپ، 62 جۇك اۆتوماشيناسىن قازاقستاندىق ەسەپكە قويعان.
ءاربىر جۇك اۆتوماشيناسىن العاشقى مەملەكەتتىك تىركەگەنى ءۇشىن رەسمي تولەم شامامەن 7-8 ملن تەڭگە بولۋى ءتيىس ەدى. الدىن الا دەرەكتەر بويىنشا مەملەكەتكە كەلتىرىلگەن شىعىن شامامەن 500 ملن تەڭگەنى قۇراعان.
الماتى قالاسىندا ۇيىمداسقان قىلمىسقا قارسى كۇرەس قىزمەتكەرلەرى تاعى ءبىر قىلمىستىق توپتى انىقتادى. كۇدىكتىلەر قازاقستانعا وڭتۇستىك كورەيادان جەتكىزىلگەن جەڭىل اۆتوكولىكتەردى زاڭسىز تىركەگەن. سونداي-اق جالعان قۇجاتتار بويىنشا تىركەلگەن 250 اۆتوكولىك انىقتالدى، ولار بويىنشا مەملەكەتكە كەلتىرىلگەن شىعىن 340 ملن تەڭگەدەن استام.
بۇل جاعدايدا قىلمىستىق توپ كولىك قۇرالدارىنا جالعان قۇجاتتار جاساعان، ولار شىعارىلعان جىلىن 2018-2020 جىلدار دەپ وزگەرتكەن، العاشقى مەملەكەتتىك تىركەۋ ءۇشىن بەلگىلەنگەن سومانى تولەمەگەن. استانا قالاسىندا قىلمىستىق توپ اۆتوكولىكتەردى اۆتوبولشەكتەر تۇرىندە جەتكىزۋدى ۇيىمداستىرعان جانە ولاردىڭ شاناقتارىن اۋىستىرۋ تۋرالى جالعان قۇجاتتار ارقىلى قازاقستاندىق ەسەپكە قويعان.
– كۇدىكتىلەر ۇستالىپ، كىنالارىن مويىندادى. سونىمەن قاتار ولاردان زاتتاي دالەلدەمەلەر مەن جالعان قۇجاتتار تاركىلەندى. تەرگەۋ امالدارى جالعاسۋدا، – دەدى ق ر ءىىم ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.