مەملەكەتتىك اكتيۆتەردى قايتارۋ بويىنشا جۇمىستار جۇرگىزىلدى.
سونىڭ اياسىندا جالعان كاسىپكەرلەردىڭ 1 ملرد تەڭگەدەن اسا كولەمدەگى مۇلىكتەرى قايتارىلادى، دەپ حابارلايدى Almaty-akshamy.kz.
الماتى قالاسىنىڭ پروكۋراتۋراسى شىعارىلعان مەملەكەتتىك اكتيۆتەردىڭ زاڭدىلىعىن تەكسەرىپ جاتىر. 2017 جىلى سوتتىڭ ۇكىمىمەن جالعان كاسىپكەرلىك پەن اقشالاي قارجىنى قولما-قول اينالدىرعانى ءۇشىن ۇيىمداسقان قىلمىستىق توپ سوتتالدى.
اتاپ ايتقاندا، 86 جالعان كاسىپكەرلىك اشىپ، 87 ملرد تەڭگەدەن اسا قاراجاتتى قولما-قول اينالدىرىپ، 27،7 ملرد تەڭگەگە سالىق تولەۋدەن جالتارعان. ولار قىلمىستىق جولمەن الىنعان قاراجاتتارىن مۇلىكتەردى ساتىپ الۋ ارقىلى زاڭداستىرعان. سوتتىڭ ۇكىمىمەن قالاداعى بەدەلدى اۋداندا ورنالاسقان 1،3 مىڭ ش/م جۋىق كولەمدە تۇرعىن ءۇي قۇرىلىسى بار جالپى كولەمى 1،4 گا بولاتىن ەكى جەر تەلىمدەرى قايتارىلدى. جەرلەردىڭ بىرەۋىندە تىكۇشاق قوناتىن الاڭ ورنالاسقان. ول وبەكتىنىڭ شامامەن نارىقتىق قۇنى 1 ملرد تەڭگەنى قۇراعان.
سونىمەن قاتار پروكۋرورلار انىقتاعانداي، قىلمىسكەرلەر مۇلىكتەرىن تاركىلەۋدەن جالتارتۋ ءۇشىن جەر تەلىمدەرىن سوتتالعانداردىڭ بىرەۋىنىڭ اكەسىنىڭ اتىنا جازعان. كەيىن سوت ۇكىمىن ورىنداۋدان جالتارۋ ءۇشىن جىلجىمايتىن مۇلىك ءتورت مارتە ۇلەستەس تۇلعالاردىڭ اراسىندا جەر تەلىمىنىڭ كونفيگۋراسياسىن وزگەرتۋ ارقىلى جۇزەگە اسىرىلعان. جالعان مامىلەلەردى جاساۋ ناتيجەسىندە مۇلىك قاعاز جۇزىندە سوتتالعانداردىڭ بىرەۋىنىڭ قىزىنا قايتارىلعان. بۇدان بولەك، وسىنداي جۇيەمەن مۇلىكتى ساقتاپ قالۋ ءۇشىن جەر تەلىمدەرىنىڭ يەلەرىنىڭ ءبىرى جالعان نەكەگە وتىرعان.
الماتى قالاسى بوستاندىق اۋدانىنىڭ پروكۋراتۋراسى اتالعان مامىلەلەردى، جالعان نەكە تۋرالى مامىلەنى زاڭسىز دەپ تانۋ تۋرالى سوتقا جۇگىندى.
«جۇرگىزىلگەن اۋقىمدى سوت پروسەستەرى، سونداي-اق ازاماتتىق ءىستىڭ اپەللياسيالىق ساتىدا قارالۋ ناتيجەسى نەگىزىندە، قاداعالاۋ ورگانىنىڭ تالاپ ارىزى تولىعىمەن قاناعاتتاندىرىلدى. جوعارىدا قابىلدانعان شارالار مەملەكەت پايداسىنا باعالى مۇلىكتەردىڭ قايتارىلۋىنا نەگىز بولادى»، - دەلىنگەن حابارلامادا.