قازاقستان، قىرعىزستان، رف، وزبەكستان، ءازىربايجان، گرۋزيا، گەرمانيا، تۇركيا، شۆەسيا مەن ۋكراينا ىشكى مەديسيناسىنىڭ ءار باعىتتاعى جەتەكشى ماماندارىن ءبىر الاڭدا بىرىكتىرەتىن اۋقىمدى ءىس-شارا ءبىزدىڭ ەلىمىزدە العاش رەت ءوتىپ وتىر، دەپ حابارلايدى aqshamnews.kz.
ۇيىمداستىرۋشىلارى - ق ر دەنساۋلىق ساقتاۋ مينيسترلىگى، كارديولوگيا جانە ىشكى اۋرۋلار عزي، قازاق ىشكى مەديسينا ماماندارىنىڭ قاۋىمداستىعى جانە قازاق ىشەك اۋرۋلارىن زەرتتەۋ جونىندەگى عىلىمي قوعامى.
كونگرەسكە ەلىمىزدىڭ بارلىق وڭىرىنەن كەلگەن تەراپيەۆتەر، جالپى پراكتيكا دارىگەرلەرى، ەندوكرينولوگ، كارديولوگ، كارديوحيرۋرگ، رەانيماتولوگ، ينتەرۆەنسيونيست، نەفرولوگ، اللەرگولوگ، ريەۆماتولوگ، پۋلمونولوگ، گەماتولوگ، گاستروەنتەرولوگ، ەندوسكوپيست، ورفاندىق اۋرۋلاردى باقىلاۋعا تارتىلعان دارىگەرلەر قاتىسۋدا.
كونگرەسستىڭ مىندەتى - ىشكى مەديسينانىڭ نەگىزگى باعىتتارى بويىنشا زاماناۋي تەوريالىق جانە پراكتيكالىق تاجىريبەنى بىرىكتىرۋ. قاتىسۋشىلار دياگنوستيكا مەن ەمدەۋدىڭ الەمدىك ترەندتەرىن، ىنتىماقتاستىق ماسەلەلەرىن تالقىلاۋدا. كونگرەسس ەلىمىزدەگى مەديسينالىق كومەكتىڭ ساپاسىن جاقسارتۋعا مۇمكىندىك بەرەتىن ءبىلىم مەن ۇزدىك كلينيكالىق تاجىريبەلەردى شوعىرلاندىرۋ الاڭىنا اينالدىرۋعا باعىتتالعان.
دارىگەرلەر مەن عالىمدار زاماناۋي كلينيكالىق پراكتيكانىڭ وزەكتى ماسەلەلەرىن، اۋرۋلاردى دياگنوستيكالاۋ مەن ەمدەۋدەگى جاڭا عىلىمي تاسىلدەردى تالقىلاۋدا. ءىس-شارا تەراپيا، ريەۆماتولوگيا، كارديولوگيا، ەندوكرينولوگيا، گاستروەنتەرولوگيا، نەفرولوگيا، اللەرگولوگيا جانە باسقا دا سالالارداعى بىرلەسكەن جۇمىس پەن ۇزدىك تاجىريبەلەردى شوعىرلاندىرۋ ءۇشىن بىرەگەي الاڭعا اينالىپ وتىر.
«ءبىزدىڭ ينستيتۋت تەراپيالىق بەيىندەگى پاسيەنتتەرگە مامانداندىرىلعان كومەكتى دامىتىپ، ەنگىزۋ ۇستىندە. كوپتەگەن سوزىلمالى ينفەكسيالىق ەمەس اۋرۋلاردى ەمدەۋدە ەرتە دياگنوستيكالاۋ مەن تەراپيانىڭ ءتۇرلى جاڭا تەحنولوگيالارىن ۇزدىكسىز ەنگىزۋدەمىز. ينستيتۋتتا ورفاندىق جانە ەندوكريندىك پاتولوگيا، ديابەتتىك تابان بويىنشا مامانداندىرىلعان ورتالىقتار، سونداي-اق ىشەكتىڭ قابىنۋ اۋرۋلارى بار ناۋقاستارعا ارنالعان ورتالىق جانە نۋتريتيۆتىك قولداۋ كابينەتى جۇمىس ىستەي باستادى. بۇل ءتاسىل تەراپيانىڭ تيىمدىلىگىن ارتتىرادى جانە ىشكى اعزالاردىڭ ءتۇرلى اۋرۋلارىن ەمدەۋ ناتيجەلەرىن جاقسارتادى»، - دەيدى كارديولوگيا جانە ىشكى اۋرۋلار عزي باسقارما ءتوراعاسى مارات پاشيموۆ.
ەرتەڭ دە جالعاساتىن ءىس-شارادا حالىقارالىق تاجىريبەسى بار ساراپشىلاردىڭ باياندامالارى تىڭدالادى، پانەلدىك پىكىرتالاستار، كلينيكالىق جاعدايلاردى تالداۋمەن پراكتيكالىق سەسسيالار وتەدى، سونداي-اق “جاس عالىمدار” بايقاۋىنىڭ جەڭىمپازدارى ماراپاتتالادى.