الماتى قالاسى سپورت باسقارماسىنىڭ مانەرلەپ سىرعاناۋشىلاردىڭ دايىندىعىنا بايلانىستى جاعداي بويىنشا تۇسىنىكتەمەسى
سپورت نىساندارىن كوممۋنالدىق مەنشىككە قايتارۋ
بۇعان دەيىن سپورتتىق قاۋىمداستىقتا جەكە مەنشىك باسقارۋىنداعى ءىرى مۇز ايدىنىنا شەكتەۋلى قولجەتىمدىلىگىنە قاتىستى ماسەلە كوتەرىلگەن بولاتىن. اتاپ ايتقاندا، باق-تا مانەرلەپ سىرعاناۋشى ميحايل شايدوروۆ الماتىدا مانەرلەپ سىرعاناۋدان ەلىمىزدىڭ ۇزدىك سپورتشىلارىن دايارلاۋ ءۇشىن ءتيىستى جاعدايدىڭ جوقتىعى تۋرالى ايتىلعان ماتەريالدار شىقتى.
2024 جىلدان باستاپ الماتى اكىمى ەربولات دوسايەۆتىڭ تاپسىرماسىمەن ءىرى سپورتتىق نىسانداردى قالانىڭ بالانسىنا قايتارۋ جۇمىستارى باستالدى. 2024 جىلى «Almaty Arena» جانە «Halyk Arena» كوپفۋنكسيونالدى كەشەندەرى كوممۋنالدىق مەنشىككە ءوتتى.
بۇل مۇزدى ءبولۋ تەتىگىن اشىق تۇردە ۇيىمداستىرۋعا جانە بارلىق ساناتتاعى سپورتشىلار ءۇشىن ارەنالارعا تەڭ قولجەتىمدىلىكتى قامتاماسىز ەتۋگە مۇمكىندىك بەردى. نىساندار بەرىلگەننەن كەيىن ولاردىڭ پايدالانىلۋىنا كەشەندى اۋديت جۇرگىزىلدى. قازىرگى ۋاقىتتا مۇز ۋاقىتىن ءبولۋ جۇيەسى كاسىبي سپورتشىلارعا، ونىڭ ىشىندە ميحايل شايدوروۆقا، سپورت مەكتەپتەرىنىڭ تاربيەلەنۋشىلەرىنە، سەكسيالار مەن ۇلتتىق قۇراما مۇشەلەرىنە باسىمدىق بەرەتىندەي ەتىپ رەتتەلدى. مۇنداي ءتاسىل ەلدىڭ بولاشاق چەمپيوندار بۋىنىن تاربيەلەۋگە سەپتىگىن تيگىزەدى.
الماتى قالاسى اكىمىنىڭ ورىنباسارى بەيبىت شاحانوۆپەن كەزدەسۋ بارىسىندا ميحايل شايدوروۆ قابىلدانىپ جاتقان شارالارعا العىس ءبىلدىرىپ، جاتتىعۋ پروسەسىنىڭ ۇيىمداستىرىلۋى مەن سپورتتىق ينفراقۇرىلىمعا قولجەتىمدىلىك بويىنشا جۇيەلى جاقسارتۋلاردى اتاپ ءوتتى. سونداي-اق، ۇلتتىق قۇرامانىڭ دايىندىق جاعدايىن قامتاماسىز ەتۋ ماسەلەسى تالقىلانعان كەزدەسۋدە، ميحايل شايدوروۆتىڭ حالىقارالىق جيىندار مەن جارىستار اراسىنداعى كەزەڭدەردە الماتىدا جۇرگەن ۋاقىتىندا «Halyk Arena» بازاسىندا جەكە جاتتىعۋ وتكىزۋ مۇمكىندىگىمەن قامتاماسىز ەتۋ تۋرالى شەشىم قابىلداندى. بۇل ونىڭ تۋعان قالاسىندا جەكە دايىندىعى مەن سپورتتىق فورماسىن ساقتاۋ ءۇشىن قولايلى جاعداي جاسايدى.
مەديسينالىق قامتاماسىز ەتۋ
ۇلتتىق قۇرامانىڭ مەديسينالىق قامتاماسىز ەتىلۋى – قازاقستان رەسپۋبليكاسى تۋريزم جانە سپورت مينيسترلىگىنىڭ قۇزىرەتىنە جاتادى.
دامۋ جوسپارلارى
الماتى اكىمدىگى قالانىڭ سپورت ينفراقۇرىلىمىن دامىتۋ مەن جاڭعىرتۋعا كەشەندى ءتاسىلىن ىسكە اسىرۋدا. بيىل ورتالىق ستاديوندى حالىقارالىق ستاندارتقا سايكەستەندىرە وتىرىپ، ونىڭ سىيىمدىلىعىن 35 مىڭ ورىنعا دەيىن ارتتىرۋ ارقىلى قايتا جاڭارتۋ جۇمىستارى باستالادى. سونداي-اق، «مەدەۋ» بيىك تاۋلى مۇز ايدىنىنىڭ ينجەنەرلىك ينفراقۇرىلىمىن جاڭارتۋ، مۇز ساپاسىن ارتتىرۋ جانە سىرعاناۋ ماۋسىمىن ۇزارتۋ باعىتىندا جاڭعىرتۋ جۇرگىزىلەدى. سونىمەن قاتار، جاساندى ينتەللەكتپەن جابدىقتالعان SmartICE جۇيەسىن ەنگىزۋ، جاڭا قوعامدىق كەڭىستىكتەر قۇرۋ ارقىلى مەدەۋدى جىل بويى جۇمىس ىستەيتىن الەمدىك دەڭگەيدەگى سپورتتىق-تۋريستىك ورتالىققا اينالدىرۋ كوزدەلىپ وتىر.
بۇعان قوسا، سوڭعى ءۇش جىلدا قالادا التى جاڭا دەنە شىنىقتىرۋ-ساۋىقتىرۋ كەشەنى سالىندى، ال بيىل تاعى ءتورت كەشەننىڭ قۇرىلىسى باستالادى. بۇل شارالاردىڭ بارلىعى وسكەلەڭ جاس سپورتشىلاردىڭ دايىندىعى ءۇشىن زاماناۋي ءارى قولجەتىمدى جاعداي جاساۋعا جانە الماتىدا بۇقارالىق جانە كاسىبي سپورتتى جۇيەلى دامىتۋعا باعىتتالعان.