مەگاپوليس اكىمى باقىتجان ساعىنتايەۆ جۇمىس ساپارى كەزىندە قالانىڭ دەنساۋلىق ساقتاۋ جۇيەسىن دامىتۋ شارالارى اياسىندا سالىنعان № 7 قكا قابىلداۋ ءبولىمىن ارالاپ كوردى، دەپ حابارلايدى Almaty-akshamy.kz.
مەديسينالىق مەكەمەنى كەڭەيتۋ الماتىنىڭ دەنساۋلىق ساقتاۋ جۇيەسىن دامىتۋدىڭ جول كارتاسى اياسىندا جۇرگىزىلدى. بولىمشە بارلىق زاماناۋي تالاپتارعا ساي.
قابىلداۋ ءبولىمى قۋاتتى اۆتونومدى جەلدەتۋ جۇيەسىمەن، زاماناۋي ەمدەۋ-دياگنوستيكالىق جابدىقتارمەن، سونىڭ ىشىندە كومپيۋتەرلىك توموگرافپەن، رەنتگەن قوندىرعىسىمەن، ۋزي اپپاراتتارىمەن جابدىقتالعان. بۇدان باسقا، وپەراسيالىق زالدار، سونداي-اق رەانيماسيالىق جانە قارقىندى تەراپيا پالاتالارى قاراستىرىلعان.
قابىلداۋ ءبولىمىنىڭ جاڭا عيماراتى بارلىق سانيتارلىق جانە تەحنيكالىق نورمالار مەن ستاندارتتارعا ساي ءارى بىلىكتى كومەك كورسەتۋ ءۇشىن مەديسينالىق پەرسونال دايىندالعان.
جاڭا عيمارات جىلىنا 100 مىڭعا دەيىنگى ناۋقاستى قابىلداۋعا ەسەپتەلگەن. تاۋلىك سايىن قالالىق كلينيكالىق اۋرۋحاناعا 300-دەن 500-گە دەيىن پاسيەنت جۇگىنەدى. جىلىنا – 80 مىڭنان استام ادام، ونىڭ 25 مىڭعا جۋىعى ستاسيوناردا ەمدەلۋدە.
بۇعان دەيىن، تاۋەلسىزدىكتىڭ 30 جىلدىعى قارساڭىندا ناۋرىزباي اۋدانىنداعى №36 ەمحانا مەن الاتاۋ اۋدانىنداعى №25 ەمحانا جانىنان زاماناۋي كت-ورتالىقتارى اشىلعان بولاتىن. وسىنىڭ ارقاسىندا جوعارى مامانداندىرىلعان مەديسينالىق-دياگنوستيكالىق كومەك الۋ ءۇشىن قادامدىق قولجەتىمدىلىك، سونداي-اق شۇعىل جانە جوسپارلى پاسيەنتتەردىڭ پاتولوگيالارىن ەرتە انىقتاۋ مۇمكىندىگى قامتاماسىز ەتىلدى.
حابارلانعانداي، بۇگىندە الماتىنىڭ دەنساۋلىق ساقتاۋ نىساندارىن جابدىقتاۋ كورسەتكىشى 91،5%. انەستەزيولوگيا، رەانيماسيا جانە قارقىندى تەراپيا بولىمشەلەرىنىڭ جابدىقتالۋى 100%-عا دەيىن جەتكىزىلدى. جەدەل مەديسينالىق جاردەم جۇمىسى جاقسارتىلدى، 3 جاڭا قوسالقى ستانسيا سالىندى. بريگادالار سانى ەكى ەسەگە ارتتى. اۆتوپارك 70%-عا جاڭاردى.
تۇڭعىش پرەزيدەنت – ەلباسى ن. نازاربايەۆتىڭ تاپسىرماسى بويىنشا اعىمداعى جانە ىقتيمال ەپيدەميولوگيالىق قاتەرلەرگە دەن قويۋ بويىنشا ەلدىڭ عىلىمي-مەديسينالىق الەۋەتىن شوعىرلاندىرۋ ماقساتىندا الماتىدا ينفەكسيالىق اۋرۋلاردىڭ كوپبەيىندى عىلىمي-زەرتتەۋ ورتالىعىنىڭ قۇرىلىسى باستالدى.
اعىمداعى جىلى ءۇش ەمحانانىڭ، 9 وتباسىلىق-دارىگەرلىك امبۋلاتوريانىڭ قۇرىلىسى باستالدى. بالالارعا شۇعىل كومەك كورسەتۋ ورتالىعىنىڭ جانە №2 بقكا قوسىمشا كورپۋستارىنىڭ، پاللياتيۆتىك كومەك ورتالىعى بار جاڭا ونكولوگيالىق ورتالىقتىڭ جانە مەدەۋ اۋدانىندا كوپبەيىندى ستاسيونار عيماراتتارىنىڭ قۇرىلىسى جۇرۋدە.
250 توسەكتىك بالالاردى وڭالتۋ ورتالىعىن جانە 50 توسەكتىك ەرتە ارالاسۋ ورتالىعىن ورنالاستىرۋ ءۇشىن بۇرىنعى الماتى تەمىر جول اۋرۋحاناسىن رەكونسترۋكسيالاۋ جانە كۇردەلى جوندەۋ جوسپارلانۋدا.