46-دان 100-گە دەيىن ۇلعايتۋ كوزدەلىپ وتىر.
مەگاپوليستە بۇگىنگى كۇنى مۇگەدەكتىگى بار جاندارعا 46 ينۆاتاكسي قىزمەت كورسەتەدى. الداعى ۋاقىتتا ولاردىڭ سانىن 100-گە جەتكىزۋ جوسپاردا، دەپ حابارلايدى Almaty-akshamy.kz قازاقپاراتقا سىلتەمە جاساپ.
«الماتىدا قالا باسشىسىنىڭ باستاماسىمەن ينۆاتاكسي سانى ارتادى. ينۆاتاكسي اۆتوكولىكتەرىن 46-دان 100-گە دەيىن ۇلعايتۋ ءۇشىن جەرگىلىكتى بيۋدجەتتەن قوسىمشا 244 ملن تەڭگە ءبولىندى»، - دەدى قالالىق جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى دانيار الكەباي ۇلى بريفينگ بارىسىندا.
ايتۋىنشا، ينۆاتاكسي قىزمەتىن ايىنا 1 500 ەرەسەك جانە 357 مۇمكىندىگى شەكتەۋلى بالا پايدالانادى. سونداي-اق، 15 700 مۇگەدەكتىگى بار جانعا كومەك بەرىلگەن.
«جىل باسىنان بەرى الماتىدا تۇراتىن 10 500 مۇمكىندىگى شەكتەۋلى جان تەحنيكالىق وڭالتۋ قۇرالدارىن الدى. سونىمەن بىرگە، 5 200 مۇگەدەكتىگى بار ادامدارعا ىمداۋ ءتىلى ماماندارىنىڭ، جەكە كومەكشىلەردىڭ كومەگى تۇرىندە الەۋمەتتىك قىزمەتتەر كورسەتىلەدى، سونداي-اق شيپاجايلىق ەمدەلۋگە جىبەرىلدى. اكىمدىكتە ينكليۋزيۆتى قوعامدى دامىتۋ ءۇشىن بارلىق شارالار قابىلدانىپ جاتىر»، - دەدى ول.
قازىرگى ۋاقىتتا قالادا 53 مىڭنان استام مۇمكىندىگى شەكتەۋلى جان تۇرادى. ونىڭ ىشىندە 18 جاسقا دەيىنگى مۇمكىندىگى شەكتەۋلى بالالار سانى – 8 151.
«جەكە وڭالتۋ باعدارلاماسىنىڭ ارقاسىندا مۇگەدەكتەر وڭالتۋعا ارنالعان تەحنيكالىق قۇرالدارمەن جانە الەۋمەتتىك قىزمەتتەرمەن تەگىن قامتاماسىز ەتىلەدى. قاجەتتى قاراجاتتى «الەۋمەتتىك قىزمەتتەر پورتالىنان» ءوتىنىم ارقىلى الۋعا بولادى، جەكەلەگەن جاعدايلاردا ءبىز مەملەكەتتىك ساتىپ الۋ ارقىلى جەكە ىرىكتەۋدى تالاپ ەتەتىن تەحنيكالىق قۇرالداردى ساتىپ الامىز»، - دەپ ءتۇسىندىردى دانيار الكەباي ۇلى.
سپيكەر قالادا 2021-2023 جىلدارعا ارنالعان نىساندارعا قولجەتىمدىلىكتىڭ كەشەندى جوسپارى جۇزەگە اسىرىلىپ جاتقانىن اتاپ ءوتتى.