«جاس قانات» تۇرعىن ءۇي كەشەنىندە ورنالاساتىن الماتى كىتاپحانالارىنىڭ جاڭا فيليالىندا ينتەراكتيۆتى ايماقتارى، سيفرلىق سەرۆيستەرى جانە شىعارماشىلىق شەبەرحانالارى بار زاماناۋي بالالار كىتاپحاناسى اشىلادى. بۇل يدەيا سەگىز الماتىلىق كىتاپحاناشى ەستونيا، فينليانديا جانە شۆەسيادا وتكەن «شەكاراسىز ءبىلىم» اتتى حالىقارالىق تاعىلىمدامادان كەيىن تۋىندادى. بۇل تۋرالى الماتى قالاسى مادەنيەت باسقارماسى حابارلادى.
تالليندە ماماندار كىتاپحانالاردىڭ بالاباقشالا جانە مەكتەپتەرمەن ىقپالداسۋىن، ۇرپاقارالىق وقىتۋ ۇلگىلەرىن زەرتتەدى. حەلسينكيدە سيفرلىق ءوزىن-وزى قىزمەت كورسەتۋ جۇيەسىن: سەنسورلى دۇڭگىرشەكتەر مەن QR-گيدتەردى، OODI ۇلتتىق كىتاپحاناسىنىڭ تاجىريبەسىن كوردى. شۆەسيادا عىلىم، تەحنولوگيا، ينجەنەريا، ونەر جانە ماتەماتيكانى بىرىكتىرەتىن STEAM-جوبالارىمەن تانىستى.
بۇل يدەيالار ءقازىردىڭ وزىندە ەنگىزىلىپ جاتىر: ورتا ءبىلىم بەرۋ ۇيىمدارىمەن ارىپتەستىك اۋقىمى كەڭەيىپ، بالالاردى مەكتەپ تابالدىرىعىن اتتاعان ساتتەن باستاپ كىتاپ وقۋعا باۋلۋ مۇمكىندىگى ارتتى؛ ۇيىرمە باعدارلامالارى جاڭارتىلدى؛ Alatau Creative Hub بازاسىندا وقۋ مەن شىعارماشىلىق كەزدەسۋلەرگە ارنالعان جازعى تەرراسا جاساقتالدى.
«بۇل تاعىلىمداما قىزمەتكەرلەرىمىزگە شابىت قانا ەمەس، ناقتى قۇرالدار دا بەردى. جاڭا فيليالدا ينتەراكتيۆتى ايماقتارى، سيفرلىق سەرۆيستەرى جانە شەبەرحانالارى بار زاماناۋي بالالار كىتاپحاناسى اشىلادى. 1 قىركۇيەكتەن باستاپ ءبىرىنشى سىنىپ وقۋشىلارى ءۇشىن اشىق ەسىك كۇندەرىن وتكىزەمىز، ال اعا بۋىنعا ارنالعان كومپيۋتەرلىك ساۋاتتىلىق باعدارلاماسىن كۇشەيتەمىز. مۇنىڭ ءبارى ءبىزدىڭ ماماندار ەستونيا، فينليانديا جانە شۆەسيادا كورىپ، بەيىمدەلگەن شەشىمدەر. ءقازىردىڭ وزىندە بۇل جوبالار الماتىلىقتاردىڭ يگىلىگىنە قىزمەت ەتە باستادى»، — دەدى الماتى كىتاپحانالارىنىڭ ديرەكتورى مەيرام بەكتەمبايەۆ.
بۇل الماتىلىق كىتاپحاناشىلاردىڭ العاشقى حالىقارالىق تاعىلىمداماسى ەمەس. بۇعان دەيىن 22 مامان كورەيا رەسپۋبليكاسىندا، شۆەيساريا مەن گەرمانيادا ءبىلىم العان. ۇزدىك تاجىريبەلەر الماتى كىتاپحانالارىن زاماناۋي ءبىلىم، تەحنولوگيا جانە مادەني قارىم-قاتىناس ورتالىقتارى رەتىندە دامىتۋعا جول اشىپ وتىر.
بۇگىندە قالا تۇرعىندارىنا تاۋلىك بويى قىزمەت كورسەتەتىن 24/7 كىتاپحانا فيليالدارى، مەترو مەن ساۋدا ورتالىقتارىنداعى اۆتونومدى ءوزىن-وزى قىزمەت كورسەتۋ بەكەتتەرى، سيفرلىق كىتاپ قورى بار almatylibrary.kz پورتالى، ينكليۋزيۆتى الاڭدار جانە مازمۇندى مادەني-تانىمدىق ءىس-شارالار باعدارلامالارى قولجەتىمدى.