الماتىدا ءيىسشىل يت اۋىر قىلمىستىڭ بەتىن اشتى

يت كۇدىكتىلەردى تاۋىپ بەرگەن. 

الماتىدا جاپپاي توبەلەسكە قاتىسۋشىلار ءيىسشىل ءيتتىڭ كومەگى ارقىلى انىقتالدى. «اگات» اتتى قىزمەتتىك-ىزدەستىرۋ ءيتى وقيعا ورنىندا قالعان قان ارقىلى كۇدىكتىلەردى تاۋىپ بەرگەن، دەپ حابارلايدى Almaty-akshamy.kz Almaty.tv سىلتەمە جاساپ.

توبەلەس جاندوسوۆ پەن اۋەزوۆ كوشەلەرىنىڭ قيىلىسىندا ورنالاسقان ۇيلەردىڭ اۋلاسىندا بولعان.

«وقيعا ورنىنا الدىمەن پاترۋلدىك ەكيپاج كەلدى. سودان كەيىن ءبىز تەرگەۋ-جەدەل توبىنىڭ قۇرامىندامىز. كوشەدە قانعا بويالعان ۇستەلدىڭ اياعى، اسحانا پىشاعى، قان، باسقا دا توبەلەستىڭ ىزدەرى انىقتالدى. يت ءىزىن سەزىپ، جاقىن جەردەگى ءۇيدىڭ پاتەرلەرىنىڭ بىرىنە اپاردى. ەسىك اشىق بولدى.  ىشىندە التى ەر ادام بولدى، بىرەۋى قۇلاعىنان جارالانعان»، – دەدى الماتى قالالىق پد وكق كىشى ينسپەكتور-كينولوگى ەربولات كوكتال.

جاپپاي توبەلەس ۇيىمداستىرعان ءبىر توپ ادام پىشاقتان بولەك، اتىس قارۋىن دا قولدانعان.

پوليسيا قىزمەتكەرلەرى ۇستالعانداردىڭ بىرىنەن كەسىلگەن اڭشى مىلتىعى مەن پىشاق تاركىلەگەن. كيىمى مەن قولىندا قان ءىزى قالعانىنا قاراماستان، توبەلەسكە قاتىسقانىن مۇلدە جوققا شىعارىپ وتىر. اتالعان دەرەك بويىنشا سوتقا دەيىنگى تەرگەۋ باستالدى.

«قىلمىسقا قاتىسۋشىلار ۇستالدى. كىمنىڭ قارۋ قولدانعانىن بوستاندىق اۋداندىق پوليسيا باسقارماسىندا باستالعان ءارى قاراي تەرگەۋ امالدارى بارىسىندا انىقتالاتىن بولادى»، – دەدى الماتى قالاسى پد جپقب پاترۋلدىك پوليسيا پولكىنىڭ ينسپەكتورى اسقار جىرعالباي.