الماتىدا 21-24 قازان ارالىعىندا ءىى حالىقارالىق قۋىرشاق تەاترلارى فەستيۆالى Almaty puppet festival – 2024 وتەدى. بيىل وعان جۇڭگو، پولشا، چەحيا، بولگاريا، گرۋزيا، تۇركيا، ازەربايجان، وزبەكستان، رەسەي، باشقۇرتستان جانە قازاقستاننىڭ ۇزدىك تەاتر ۇجىمدارى قاتىسادى، دەپ حابارلايدى aqshamnews.kz.
الماتى قالاسى اكىمدىگىنىڭ قولداۋىمەن مەملەكەتتىك قۋىرشاق تەاترى ۇيىمداستىراتىن فەستيۆالدىڭ ماقساتى – كورەرمەندەردى زاماناۋي قۋىرشاق ونەرىنىڭ قويىلىمدارىمەن تانىستىرۋ، حالىقارالىق شىعارماشىلىق بايلانىستاردى نىعايتۋ جانە تەاتر سالاسىنداعى كرەاتيۆتى ويلاردى شابىتتاندىراتىن شىعارماشىلىق الاڭ قۇرۋ.
«ءبىز ءۇشىن بۇل فەستيۆال ۇلكەن مەرەكەگە اينالدى. وتكەن جىلى العاش رەت وسى اۋقىمدى شارانى وتكىزگەندە وعان 6 ەلدىڭ قۋىرشاق تەاترلارى قاتىستى. بيىل 11 ەلدەن كەلگەن ۇجىمدار قاتىسىپ جاتىر. بۇل ءبىزدىڭ فەستيۆالدىڭ بەدەلى مەن ابىرويىنىڭ كورسەتكىشى»، – دەدى مەملەكەتتىك قۋىرشاق تەاترىنىڭ ديرەكتورى المات ءابدىراحمانوۆ.
ءىى حالىقارالىق قۋىرشاق تەاترلارى فەستيۆالى Almaty puppet festival – 2024 قالا مادەنيەتىنىڭ ماڭىزدى وقيعاسى بولماق، سونداي-اق قۋىرشاق ونەرىنىڭ شەبەرلەرى اراسىندا تاجىريبە مەن يدەيا الماسۋ الاڭىنا اينالادى. فەستيۆال اياسىندا ءتۇرلى ەرەكشە قۋىرشاق كەيىپكەرلەرى بار قويىلىمداردان بولەك، تانىمدىق شىعارماشىلىق كەزدەسۋلەر مەن شەبەرلىك دارىستەرى دە وتكىزىلەدى.