الماتىدا 26-30 شىلدە ارالىعىندا قازاق مەملەكەتتىك سيركىندە ALMATY CIRCUS FESTIVAL I حالىقارالىق سيرك ونەرى فەستيۆالى ءوتتى. بۇل ءىس-شارا قازاقستاندا العاش رەت ءوتتى، 5 كۇن ىشىندە سيرككە 8 مىڭعا جۋىق ادام قاتىستى، دەپ حابارلايدى almaty-akshamy.kz
فەستيۆال اياسىندا 28 شىلدەدە قازىلار القاسى جانە قوناقتارمەن ب ا ق وكىلدەرىنە ارنالعان باسپا ءسوز كونفەرەنسياسى ۇيىمداستىرىلدى. سول كۇنى سيرك عيماراتىندا فەستيۆال سالتاناتتى تۇردە اشىلدى، وندا شەتەلدىك جانە وتاندىق گيمناستتار، اكروباتتار مەن جونگلەرلەر فەستيۆالدىڭ ەڭ جوعارى ناگراداسىن الۋ ءۇشىن وزدەرىنىڭ تالانتتارى مەن كاسىبي شەبەرلىكتەرىن كورسەتتى.
«ءبىز مۇنداي فەستيۆالدى العاش رەت وتكىزىپ وتىرمىز جانە سول ارقىلى الەمدەگى وتاندىق سيرك ونەرىنىڭ ۇزدىك جەتىستىكتەرىن ساقتاۋ، دامىتۋ جانە ىلگەرىلەتۋدىڭ قاراپايىم ماقساتىن باسشىلىققا الامىز»، - دەپ اتاپ ءوتتى قازاق مەملەكەتتىك سيركىنىڭ ديرەكتورى ماقسات جايىقوۆ.
فەستيۆالدىڭ بارلىق بەس كۇنىندە الەمنىڭ 14 ەلىنەن: قازاقستان، گەرمانيا، ۆەتنام، ەفيوپيا، ياكۋتيا، ۋكراينا، بەلارۋس، رەسەي، ۇلىبريتانيا، ليتۆا، چەحيا، وزبەكستان، قىرعىزستان جانە تاجىكستاننان كەلگەن ارتىستەر مەن سيركشىلەر ءبىر ساحنادا ونەر كورسەتتى.
قالا تۇرعىندارى مەن قوناقتارى ءۇشىن قازاق مەملەكەتتىك سيركىنىڭ مانەجىندە سيرك ونەرىنىڭ بارلىق جانرلارىندا ەكۆيليبريستەر، اكروباتتار، ارقانمەن جۇرۋشىلەر، سايقىمازاقتار مەن جونگلەرلەر ورىنداعان ۇزدىك نومىرلەر ۇسىنىلدى. ءىس-شارا باعدارلاماسىنا كاسكادەرلىك ونەردىڭ الەمدىك جۇلدىزدارى بولىپ تابىلاتىن جانە Netflix، HBO حالىقارالىق جوبالارىنا قاتىساتىن تەڭدەسى جوق وتاندىق «Nomad» ات سپورتى مەكتەبىنىڭ ات-اكروباتيكالىق نومىرلەرى ۇسىنىلدى.
30 شىلدەدە قازاق مەملەكەتتىك سيرك عيماراتىندا ALMATY CIRCUS FESTIVAL حالىقارالىق سيرك ونەرى فەستيۆالىنىڭ رەسمي جابىلۋى ءوتتى. بۇل كۇنى ۇزدىك ارتىستەر سالتاناتتى تۇردە ماراپاتتالدى، سونداي-اق ونىڭ سوڭى گالا-شوۋعا ۇلاستى. فەستيۆال ۇيىمداستىرۋشىلارى ارتىستەر اراسىندا ءۇش جۇلدەلى ورىندى، سونداي-اق ارنايى سىيلىق – گران-پريدى تاعايىندادى. ونى ارنايى گران-پريدى «قۇرمەت» وردەنىنىڭ يەگەرى قاناتبەك كۇنعوجينوۆ «Nomad» (قازاقستان، الماتى) اتتى اكروباتيكالىق نومىرىمەن الدى. التىن جۇلدەنى ۆەتنام، ياكۋتيا جانە رەسەي سيرك ارتىستەرى ءوزارا ءبولىستى. كۇمىستى وزبەكستان، قازاقستان جانە ۆەتنام سيركتەرى جەڭىپ الدى. قولا جۇلدەنى گەرمانيا، بەلارۋس، تاجىكستان جانە ليتۆا ارتسىتەرى يەلەندى.
شەتەلدىك سيرك ونەرپازدارى ءۇشىن قوسىمشا نوميناسيالار بويىنشا ارنايى سىيلىقتار قاراستىرىلدى. سونىمەن، رەسەي، ۆەتنام، تاجىكستان جانە بەلارۋستان كەلگەندەر «مامونتەنوك-2024» VII حالىقارالىق سيرك ونەرى فەستيۆالىنە شاقىرۋلار الدى، ال ليتۆادان كەلگەن ارتىسكە گەرمانياداعى «Winterzauber Event UG» روجدەستۆولىق سيرك قويىلىمدارىن ۇيىمداستىرۋ جونىندەگى كومپانيا ديرەكتورىنىڭ شاقىرۋ-كەلىسىمشارتى بەرىلدى.
«سيرك مانەجى فەستيۆالدىڭ بارلىق قاتىسۋشىلارى مەن قوناقتارى ءۇشىن دوستىق قارىم-قاتىناس جانە جاڭا ارتىستەرمەن تانىسۋ الاڭىنا، ەلدەر مەن ارتىستەر اراسىندا پەرسپەكتيۆالى جانە جەمىستى جۇمىس قاتىناستارىن ورناتۋ مۇمكىندىگىنە اينالدى. بۇل جىل سايىن وتكىزىلەتىن العاشقى فەستيۆال»، - دەپ اتاپ ءوتتى فەستيۆالدىڭ قويۋشى-رەجيسسەرى، ۋدمۋرت رەسپۋبليكاسىنىڭ حالىق ءارتىسى جانە روسگوسيركتىڭ باس رەجيسسەرى ەلەنا پەتريكوۆا.
سيرك ونەرىن ساقتاۋ جانە دامىتۋ ماقساتىندا الماتى قالاسى اكىمدىگىنىڭ قولداۋىمەن Almaty CIRCUS FESTIVAL حالىقارالىق سيرك ونەرى فەستيۆالى ءوتتى. فەستيۆال ۇيىمداستىرۋشىلارى جىل سايىن وسىنداي ءىس-شارا وتكىزۋدى جوسپارلاپ وتىر.
الماتىدا ALMATY CIRCUS FESTIVAL باعدارلاماسى 27 تامىزعا دەيىن جالعاسادى. قويىلىمدار قازاق مەملەكەتتىك سيركىندە وتەدى.
