ەلەكتروندى كەزەك تالونىن الۋ كەزەگى ارتتى.
شەتەلدىكتەردىڭ حقو-لارعا جاپپاي كەلۋىنە بايلانىستى «ازاماتتارعا ارنالعان ۇكىمەت» مەملەكەتتىك كورپوراسياسى حالىققا قىزمەت كورسەتۋ ورتالىقتارىنىڭ جۇمىسىن كۇشەيتىلگەن رەجيمگە كوشىرۋ جونىندە شەشىم قابىلدادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ازاماتتارعا ارنالعان ۇكىمەت» فيليالى باسشىلىعى الماتىلىقتارعا ۇندەۋ جاسادى.
«بۇگىنگى كۇنى قازاقستان اۋماعىنا ۋاقىتشا كەلگەن شەتەلدىكتەرگە جسن بەرۋ قىزمەتىن جانە ق ر اۋماعىندا ۋاقىتشا تۇرۋعا رۇقسات الۋعا رەزيدەنت ەمەستەردىڭ كەلۋىنە بايلانىستى فيليالدىڭ اۋداندىق بولىمدەرىندە كورسەتىلەتىن قىزمەتتى الۋشىلاردىڭ كوبەيگەنى بايقالادى. وسىعان بايلانىستى ءبىرىڭعاي ەلەكتروندى كەزەك تالونىن الۋعا دا كەزەك ارتتى»،- دەيدى الماتى قالالىق فيليالىنىڭ ديرەكتورى ابدۋراسۋل كۋلداشوۆ.
ونىڭ ايتۋىنشا، حالىققا قىزمەت كورسەتۋ بولىمدەرىندەگى ءبىرىڭعاي ەلەكتروندى كەزەك تالوندارىن «انىقتاما» سەكتورىنداعى مامانداردان دا، «ءموبيلدى حقو» قوسىمشاسىنداعى QR كودتى سكانەرلەۋ جولىمەن دە الۋعا بولادى.
QR كودتارى بارلىق بولىمدەردە قىزمەت الۋشىلارعا كورىنەتىن جەرلەردە ورنالاستىرىلعان.
سونداي-اق، ول شەتەلدىكتەردىڭ حقو-لارعا جاپپاي كەلۋىنە بايلانىستى، «ازاماتتارعا ارنالعان ۇكىمەت» مەملەكەتتىك كورپوراسياسى ارنايى كۇشەيتىلگەن حقو-لاردا قابىلداۋ تۋرالى شەشىم شىعارعانىن ايتتى.
الماتى قالاسىندا كۇشەيتىلگەن حقو «قۇلاگەر» شاعىناۋدانى، سەرىكوۆ كوشەسى، 6ا (2-قابات) مەكەنجايىندا جۇمىس ىستەيدى.
جسن الۋعا ءوتىنىم وسى جەتىسۋ اۋداندىق كۇشەيتىلگەن حقو-دا قابىلدانادى.
«قابىلدانعان شارالار حقو-دا جسن الۋشىلار كەزەگىن ازايتادى. مەملەكەتتىك كورپوراسيا بولىپ جاتقان جاعدايدى رەتكە كەلتىرۋ ءۇشىن بارلىق مۇمكىندىكتى قاراستىرىپ جاتىر. وسى رەتتە كليەنتتەردى تۇسىنىكپەن قاراۋعا شاقىرامىز» - دەدى ول.
جسن الۋ ءۇشىن شەتەلدىكتەردەن جەكە باسىن كۋالاندىراتىن قۇجات تالاپ ەتىلەدى.
ال كورسەتىلەتىن قىزمەتتى الۋشىنىڭ رەسمي وكىلى جۇگىنگەن جاعدايدا، نوتاريالدى كۋالاندىرىلعان سەنىمحات جانە ءوتىنىشى قاجەت بولادى.
شەتەلدىكتەر ءۇشىن جسن كۋالىگىن بەرۋ مەرزىمى – 1 جۇمىس كۇنى. قازاقستاندا جسن الۋ بارلىعىنا تەگىن.
الماتى قالاسىنداعى حقو-لار شتاتتىق رەجيمدە دۇيسەنبى-جۇما ارالىعىندا 9:00-دەن 18:00-گە دەيىن، ال كەزەكشى حقو-لار سەنبىدە 9:00-دەن 13:00-گە دەيىن جۇمىس ىستەپ تۇر.
قىزمەت الۋشىلار «ءموبيلدى حقو» قوسىمشاسى، eGov mobile، EgovKzBot2.0 تەلەگرام-بوتى، eGov ەلەكتروندى ۇكىمەت پورتالى جانە 1414 ءبىرىڭعاي بايلانىس ورتالىعى ارقىلى حقو-عا كەزەككە تۇرۋ ءۇشىن الدىن الا تاپسىرىس بەرە الادى.