ۇلتتىق بانك ءتوراعاسى عالىمجان ءپىرماتوۆ باسقارۋشى ديرەكتور كريستالينا گەورگييەۆا باستاعان حۆق دەلەگاسياسىمەن بىرلەسىپ، كاۆكاز، ورتالىق ازيا جانە موڭعوليا ەلدەرىندە الەۋەتتى دامىتۋ جونىندەگى حالىقارالىق ۆاليۋتا قورىنىڭ (حۆق) وڭىرلىك ورتالىعىن اشتى، دەپ حابارلايدى Almaty-akshamy.kz.
شاراعا ايماقتاعى جانە الەم ەلدەرىندەگى ورتالىق بانكتەردىڭ، حالىقارالىق قارجى ۇيىمدارى مەن ءبىرقاتار ديپلوماتيالىق ميسسيالاردىڭ باسشىلارى، سونداي-اق مەملەكەتتىك ورگانداردىڭ وكىلدەرى قاتىستى.
حالىقارالىق ۆاليۋتا قورىنىڭ وڭىرلىك ورتالىعىنىڭ رەسمي اشىلۋ سالتاناتىنىنا الماتى قالاسىنىڭ اكىمى ەربولات دوسايەۆ قاتىسىپ ءسوز سويلەدى.
- بۇل – ءبىزدىڭ قالامىزدىڭ ەلدەرمەن، ولاردىڭ ەكونوميكالارى اراسىنداعى ىنتىماقتاستىعىن كورسەتەتىن ماڭىزدى وقيعا.
حۆق مەن قازاقستان ۇلتتىق بانكىنىڭ بىرلەسكەن كۇش-جىگەرى كاۆكاز، ورتالىق ازيا جانە موڭعوليا ءوڭىرى ءۇشىن الەۋەتتى دامىتۋدىڭ وڭىرلىك ورتالىعىن ويداعىداي قۇرۋعا ءوز ۇلەسىمدى قوسۋعا مۇمكىندىك بەردى. بۇل ۇدەرىس 2020 جىلدىڭ جەلتوقسانىندا پاندەميا جاعدايىندا، ءتيىستى كەلىسىم-حاتقا قول قويىلعان كەزدە باستالدى. ماعان ديناميكالىق جانە پروگرەسسيۆتى كوزقاراسىمىزدىڭ دالەلى بولىپ تابىلاتىن وسى ورتالىقتى قۇرۋعا بەلسەندى تۇردە ۇلەس قوسۋ مۇمكىندىگى بەرىلدى.
وڭىرلىك ورتالىقتىڭ بۇگىنگى اشىلۋى وعان قاتىسۋشى ەلدەر اراسىنداعى الەۋەتتى دامىتۋعا جانە ءبىلىم الماسۋعا ىقپال ەتەتىن، سونداي-اق وڭىردەگى ورنىقتى ەكونوميكالىق ءوسۋ مەن قارجىلىق تۇراقتىلىققا ىقپال ەتەتىن وڭىرلىك ىنتىماقتاستىق جونىندەگى ءبىزدىڭ كۇش-جىگەرىمىزدەگى ماڭىزدى كەزەڭ بولادى. الماتىدا ءومىر ءسۇرۋ ساپاسىن جاقسارتۋ جانە دامىتۋ ءۇشىن ناقتى بەلگىلەنگەن ستراتەگيالار بار. ءوزىنىڭ جايلى ورنالاسۋىمەن، دامىعان ينفراقۇرىلىمىمەن جانە بيزنەسكە قولايلى ورتاسىمەن ءبىزدىڭ قالا ساۋدا، ينۆەستيسيا جانە ىنتىماقتاستىق ءۇشىن كوپتەگەن مۇمكىندىكتەر ۇسىنادى. ءبىز الماتىنىڭ الەۋەتىن جاڭا مۇمكىندىكتەر رەتىندە زەرتتەۋ ءۇشىن كاۆكاز، ورتالىق ازيا جانە موڭعوليادان كەلگەن كاسىپورىنداردى، ينۆەستورلار مەن كاسىپكەرلەردى قۇپتايمىز، دەدى قالا اكىمى.
وڭىرلىك ورتالىقتى قازاقستاندا ورنالاستىرۋ تۋرالى شەشىمدى حۆق 2019 جىلدىڭ قازان ايىندا قازاقستاننان، وزبەكستاننان جانە گرۋزيادان تۇسكەن وتىنىمدەردى قاراعاننان كەيىن قابىلدادى. الماتىداعى كەڭسە وڭىردەگى ءبىرىنشى جانە ادامي الەۋەتتى دامىتۋ جونىندەگى حالىقارالىق ۆاليۋتا قورىنىڭ شوتى بويىنشا 17ء-شى ورتالىق بولىپ تابىلادى.