جيىنعا 2000-نان استام ادام قاتىسادى.
29 قىركۇيەك پەن 2 قازان ارالىعىندا الماتىدا حالىقارالىق Almaty Mount Fest تاۋ سپورتى فەستيۆالى وتەدى، دەپ حابارلايدى Almaty-akshamy.kz
ءىس-شارانى الماتى قالاسىنىڭ تۋريزم باسقارماسى ۇيىمداستىرىپ وتىر.
فەستيۆال وتكەن جىلعىداي جارىستىڭ 4 ءتۇرىن قامتيدى، وعان 2 مىڭنان استام كاسىپقوي سپورتشى مەن بەلسەندى دەمالىستى ۇناتاتىن اۋەسقويلار قاتىسا الادى. ولارعا تۋريادا، downhill، skyrunning مەن الپينيادادا وزدەرىن سىناپ كورۋ ۇسىنىلىپ وتىر.
بۇدان بولەك، Almaty Mount Fest 2023 ۇيىمداستىرۋشىلارى 6 مەن 14 جاس ارالىعىنداعى بالالار جانە مۇمكىندىگى شەكتەۋلى جاندارعا ارناپ، تاۋعا شىعۋ مەن تۋريادانىڭ ارنايى باعىتتارىن دايىنداپ قويعان. فەستيۆالدىڭ نەگىزگى سپورتتىق جانە مادەني شارالارى "مەدەۋ" مەن "شىمبۇلاق" تاۋ شاڭعىسى شيپاجايىندا وتەدى.
"الماتىلىقتار مەن وڭتۇستىك استانامىزدىڭ قوناقتارى اراسىندا يگى داستۇرگە اينالعان حالىقارالىق تاۋ سپورتى فەستيۆالىنىڭ وتەتىنىن حابارلاۋعا قۋانىشتىمىز. الماتى شەتەلدىك تۋريستەردىڭ كەلۋى جاعىنان كوش باستاپ تۇر، شاھاردا ساياحاتتاۋشىلارعا جايلى جاعداي مەن جاقسى مۇمكىندىكتەر جاسالعان، قالا ينفراقۇرىلىمى دا دامىعان"، - دەيدى الماتى قالاسىنىڭ تۋريزم باسقارماسى جەتەكشىسى عاليا توقسەيىتوۆا.
فەستيۆال سوڭىندا اۋقىمدى ىسكەرلىك فورۋم وتەدى. ونىڭ تاقىرىبىنا تاۋ ءتۋريزمىن دامىتۋدىڭ جاڭا مۇمكىندىكتەرى، ونىڭ ىشىندە ەكولوگيالىق تۇراقتى ساياحاتتار، دەمالىستى ۇيىمداستىرۋدىڭ كرەاتيۆتى فورماتتارى، سونداي-اق، تاۋلى ايماقتاعى ينكليۋزيۆتى تۋريزم ماسەلەلەرى ارقاۋ بولادى. پىكىرتالاس الاڭىنا قاتىساتىنىن اندوررا، فرانسيا، قىرعىزستان، رەسەي، گرۋزيا، يتاليا مەن باسقا دا ەلدەردىڭ حالىقارالىق ساراپشىلارى راستاپ قويعان.
قاتىسۋشىلاردى تىركەۋ 22 قىركۇيەكتە باستالىپ، 28 قىركۇيەككە دەيىن جالعاسادى.