ءىس-شارانىڭ ماقساتى - وتباسى قۇندىلىعىن ناسيحاتتاۋ
2023 جىلعى 15 مامىر كۇنى حالىقارالىق وتباسى كۇنى اياسىندا الماتى قالاسى رەسپۋبليكالىق دوستىق ءۇيى مەن «PROFEXPERT» ج ش س ۇيىمداستىرۋىمەن «ايەل - وتباسىنىڭ جىلۋى» اتتى ءىس-شارا ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ءىس-شارانىڭ ماقساتى - وتباسى مادەنيەتى تۋرالى تۇسىنىك بەرۋ، باۋىرمالدىق، قايىرىمدىلىق قاتىناستارىن نىعايتۋ، باقىتتى جانۇيانىڭ مودەلىن دايىنداۋ، وتباسى قۇندىلىعىن ناسيحاتتاۋ.
كەزدەسۋگە «الماتى» تەلەراديوكومپانياسىنىڭ باس پروديۋسەرى راليدا مۇقانوۆا، بەلگىلى تەلەجۋرناليست، قازاقستان جۋرناليستەر وداعى سىيلىعىنىڭ لاۋرەاتى تولقىن سايدۋوۆا، «PROFEXPERT» ج ش س ديرەكتورى رۋسلان قاليوللا ۇلى جانە ەتنومادەني بىرلەستىكتەردىڭ مۇشەلەرى مەن بەلسەندىلەرى، ب ا ق وكىلدەرى قاتىستى.
كەزدەسۋ باسىندا الماتى قالاسى رەسپۋبليكالىق دوستىق ءۇيى باسشىسى نۇرساۋلە التەكوۆا قاتىسۋشىلاردى وتباسى مەرەكەسىمەن قۇتتىقتاپ، مىقتى، بەرىك، تاتۋ وتباسى جاستارعا ۇلگى بولاتىنىن تىلگە تيەك ەتتى. وتباسى قاشاندا ءارتۇرلى ۇرپاق اراسىنداعى بايلانىستىرۋشى بۋىن، رۋحاني جانە مادەني ءداستۇردىڭ ساقتاۋشىسى بولىپ تابىلاتىنىن اتاپ ءوتتى.
– ءاربىر ادام ءوزى باقىتتى بولۋى ءۇشىن، ەڭ باستىسى، وزگەلەردى، ونىڭ ىشىندە ءبىرىنشى بولىپ بالالاردى باقىتتى ەتۋ كەرەك. بالا وتباسىنىڭ جىلۋىن، قولداۋىن سەزىنگەندە عانا باقىتتى بولىپ ەرجەتەتىنىن بىلەمىز. سەبەبى بۇگىن - جارىق دۇنيەدەگى ەڭ جاقىن جاندارىڭىزدىڭ ءتول مەرەكەسى، – دەپ اتاپ ءوتتى بەلگىلى تەلەجۋرناليست تولقىن سايدۋوۆا.
وتباسى تاقىرىبى جينالعان قاتىسۋشىلاردى وتە قىزىقتىردى. كەزدەسۋ سوڭىندا قاتىسۋشىلار سۇراعىن قويىپ، ءبىر-بىرىن مەرەكەمەن قۇتتىقتادى.