الماتىدا ق ر مام قولداۋىمەن «جاستار ورتالىق ازيانىڭ تۇراقتى دامۋى ءۇشىن» حالىقارالىق فورۋمى وتۋدە. ءىس-شارا بۇۇدب-نىڭ «ورتالىق ازياداعى زورلىقشىل ەكسترەميزمىنىڭ الدىن الۋ ماقساتىندا جەرگىلىكتى قوعامداستىقتاردىڭ تۇراقتىلىعىن نىعايتۋ» وڭىرلىك جوباسى شەڭبەرىندە ۇيىمداستىرىلدى، دەپ حابارلايدى aqshamnews.kz.
وعان قازاقستان، قىرعىزستان، وزبەكستان، تاجىكستان، تۇرىكمەنستان وكىلدەرى، سونداي-اق جاپونيا مەن شۆەيساريادان كەلگەن بۇۇ ساراپشىلارى قاتىسادى.
فورۋم تاجىريبە الماسۋعا، جاستار ساياساتىنىڭ وزەكتى ماسەلەلەرىن تالقىلاۋعا، سونىمەن قاتار قازىرگى جاستاردىڭ قۇقىقتارى مەن قاجەتتىلىكتەرىنىڭ جاعدايى تۋرالى اقپارات بەرۋگە باعىتتالعان. جۇمىس بارىسىندا وڭىرلىك ىنتىماقتاستىق ءۇشىن نەگىزگى باسىمدىقتار ايقىندالاتىن بولادى.
فورۋم اياسىندا ورتالىق ازيا ەلدەرىندە جاستاردى دامىتۋ جانە ولاردى جۇمىسپەن قامتۋ ماسەلەلەرىمەن اينالىساتىن مەملەكەتتىك ورگاندار، ۆەدومستۆولىق باعىنىستى ۇيىمدار، ۇكىمەتتىك ەمەس ۇيىمدار، ءدىني قىزمەتكەرلەر مەن قۇرىلىمدار وكىلدەرى ءوز ويىن ورتاعا سالادى.