الماتىدا حالىقارالىق «International Haileybury FIRST Championship» چەمپيوناتىنىڭ جەڭىمپازدارى انىقتالدى. ولار: «Champions Award» نوميناسياسىندا ورال قالاسىنىڭ «HighTech» كومانداسى، «Winning Alliance Captain» نوميناسياسىندا الماتى قالاسىنىڭ «Balga men Shege» كومانداسى، «Inspire Award Winner» نوميناسياسىندا جاڭاوزەن قالاسىنىڭ «Rebels» كومانداسى.
ءار نوميناسيا بويىنشا چەمپيونات جەڭىمپازدارى مەن ۇزدىك نوميناسيا يەگەرلەرى ءبىلىم باسقارماسىنىڭ ديپلومدارىمەن جانە باعالى سىيلىقتارمەن ماراپاتتالدى. سونداي-اق، ۇزدىك ناتيجە كورسەتكەن وقۋشىلارعا قازاقستان-بريتان تەحنيكالىق ۋنيۆەرسيتەتى مەن «تۇران» ۋنيۆەرسيتەتىنىڭ ءبىلىم گرانتتارى تابىس ەتىلدى. International Haileybury FIRST Championship چەمپيوناتىنا قازاقستان، بىرىككەن اراب امىرلىكتەرى، قىرعىزستان جانە وزبەكستان بارلىعى 250-دەن اسا وقۋشىنى قامتيتىن 36 مەكتەپ كوماندالارى قاتىستى.
روبوتوتەحنيكا بويىنشا حالىقارالىق International Haileybury FIRST Championship چەمپيوناتىن الماتى قالاسىنىڭ ءبىلىم باسقارماسى «USTEM Robotics» قورىمەن جانە Haileybury Almaty حالىقارالىق مەكتەبىمەن بىرلەسە وتىرىپ، الماتىدا 2023 جىلدىڭ 28-29 ماۋسىمىندا وتكىزدى.
چەمپيوناتتىڭ نەگىزگى ماقساتى – عىلىم، تەحنولوگيا، ينجەنەريا جانە ماتەماتيكا (STEM) سالاسىنداعى داعدىلاردى دامىتۋ؛ عىلىم، تەحنولوگيا جانە تەحنيكا سالاسىندا شەتەلدىك ۇجىمدارمەن تاجىريبە الماسۋ؛ ءتۇرلى شەت ەلدەردىڭ جاستارى اراسىنداعى قارىم-قاتىناس پەن دوستىقتى نىعايتۋ.
چەمپيونات 2 كاتەگوريا بويىنشا ءوتتى: FIRST LEGO League Challenge جانە FIRST Tech Challenge. قاتىسۋشىلاردىڭ جاس ساناتى 10-18 جاس ارالىعىن قامتىدى.
حالىقارالىق چەمپيونات جوبالاردىڭ تەحنيكالىق اسپەكتىلەرىن عانا ەمەس، سونىمەن قاتار كوماندالاردىڭ كرەاتيۆتىلىگىن، تيىمدىلىگىن جانە بىرلەسىپ جۇمىس ىستەۋ قابىلەتىن باعالايدى، بۇل جارىستى ودان ءارى قىزىقتى جانە تارتىستى ەتەدى، سونداي-اق، روبوتوتەحنيكا سالاسىنداعى ەڭ جارقىن جانە ەڭ دارىندى جاستارعا ارنالعان ۇلكەن بايقاۋ بولىپ تابىلادى.
جىل سايىن روبوتوتەحنيكامەن اينالىساتىن بالالار سانى ارتىپ، وسى باعىتتاعى ۇيلەسىمدى جۇمىستىڭ ناتيجەسىندە الماتىلىق مەكتەپ وقۋشىلارى روبوتوتەحنيكادان ۇزدىك ناتيجەلەر كورسەتىپ كەلەدى.
قازاقستانداعى روبوتوتەحنيكا تاريحىندا العاش رەت داللاس قالاسىندا (اقش) وتكەن Vex Spin Up كاتەگورياسى بويىنشا الەم چەمپيوناتىندا الماتىنىڭ قۇراما كومانداسى ۇزدىك وندىققا كىرىپ، ءوز ديۆيزيونىنداعى 80 كوماندا اراسىنان الدىڭعى قاتاردان كورىندى.
سونداي-اق، الماتىلىق وقۋشىلار حيۋستون قالاسىندا (اقش) وتكەن FIRST World Championship الەم چەمپيوناتىندا بىردەن ءۇش نوميناسيانى جەڭىپ الدى. ءۇندىستاننىڭ پۋنا قالاسىندا FIRST Tech Challenge India Championship 2023 تۋرنيرىندە ءبىزدىڭ وقۋشىلار بەدەلدى Finalist Alliance Captain Award سىيلىعىنا يە بولدى.
چەمپيونات روبوتوتەحنيكا سالاسىنداعى ءوزارا تاجىريبە الماساتىن جانە شابىتتاندىراتىن بىرەگەي الاڭعا اينالدى جانە جان-جاقتان جينالعان جاس قاتىسۋشىلار ءوز شەبەرلىكتەرىن كورسەتە وتىرىپ، عىلىم مەن تەحنولوگيانىڭ بولاشاق كوشباسشىلارى بولۋعا مۇمكىندىك الدى. بۇل قازاقستانداعى STEM باعىتىن دامىتۋداعى ۇلكەن جانە جەمىستى جولدىڭ باستاماسى.