الماتى قالاسىنىڭ قالا قۇرىلىسىن باقىلاۋ باسقارماسى قاراعايلى ىقشاماۋدانىندا ورنالاسقان تۇرعىن ءۇي كەشەنىن بۇزۋ تۋرالى سوت شەشىمى مەن زاڭسىز «فرانسۋز ءۇيى» اتاۋىن پايدالانۋ ماسەلەلەرى بويىنشا قوسىمشا اقپارات بەردى، دەپ حابارلايدى aqshamnews.kz
جوسپاردان تىس تەكسەرۋ بارىسىندا تۇرعىن ءۇي كەشەنىنىڭ ەسكيزدىك جوبانى بەكىتپەي، ساراپتاماسىز جانە ءتيىستى قۇجاتتاماسىز سالىنعانى انىقتالعان. وسىعان بايلانىستى تاپسىرىس بەرۋشىگە اكىمشىلىك شارالار قولدانىلىپ، الماتى قالاسىنىڭ مامانداندىرىلعان اۋدانارالىق ەكونوميكالىق سوتىنا كەشەندى بۇزۋ تۋرالى تالاپ ارىز جولدانعان.
2023 جىلدىڭ 26 شىلدەسىندە سوت بۇل تالاپ ارىزدى قاناعاتتاندىردى، ال 2023 جىلدىڭ 26 قازانىندا قالالىق سوت شەشىمدى وزگەرىسسىز قالدىردى. 2024 جىلدىڭ 30 قاڭتارىندا اتقارۋ قۇجاتى ادىلەت دەپارتامەنتىنە تاپسىرىلىپ، اتقارۋشىلىق ءىس جۇرگىزۋ باستالدى.
قۇرىلىس سالۋشى كومپانيا «فرانسۋز ءۇيى» اتاۋىن زاڭسىز پايدالانعانى ءۇشىن سوت شەشىمىمەن جاۋاپقا تارتىلدى. 2024 جىلدىڭ 29 ساۋىرىندە الماتى قالاسىنىڭ مامانداندىرىلعان اۋدانارالىق ەكونوميكالىق سوتى «فرانسۋزسكيي دوم BSB» ءجشس-نىڭ تالاپ ارىزىن قاناعاتتاندىرىپ، بۇل اتاۋمەن جىلجىمايتىن مۇلىك ساتۋعا تىيىم سالدى. سونىمەن قاتار، «فرانسۋز ءۇيى» تاۋار بەلگىسىن تۇرعىن ءۇي كەشەنىنىڭ بارلىق قۇجاتتارىنان، ينتەرنەت-رەسۋرستاردان جانە جارنامالىق ماتەريالداردان الىپ تاستاۋ مىندەتتەلدى.
الماتى قالاسىنىڭ قالا قۇرىلىسىن باقىلاۋ باسقارماسى زاڭ بۇزۋشىلىقتاردى بولدىرماۋ ماقساتىندا باقىلاۋ شارالارىن كۇشەيتۋدى جالعاستىرۋدا.