الماتىدا ەسىرتكى تاسىمالىنىڭ جولى كەسىلدى

قىلمىسكەرلەر ەسىرتكىنى ءتىپتى بالالار تاماعىنا ارنالعان ىدىسپەن تاسىمالداۋعا تىرىسقان.

جالپى سالماعى 24 كەلىگە جۋىق ەسىرتكى زاتتارى تاركىلەندى، دەپ حابارلايدى Almaty-akshamy.kz  قازاقپاراتقا سىلتەمە جاساپ. 

بارلىق بۇزۋشىلىقتار حالىقارالىق سالەمدەمەلەردە انىقتالعان. بۇل تۋرالى ق ر قم مەملەكەتتىك كىرىستەر كوميتەتى حابارلادى.

تەك 2022 جىلدىڭ باسىنان باستاپ الماتى قالاسى بويىنشا مەملەكەتتىك كىرىستەر دەپارتامەنتىنىڭ «جەتىسۋ» كەدەن بەكەتىنىڭ قىزمەتكەرلەرى الماتى قالاسىنىڭ اۋە كولىگى پروكۋراتۋراسىنىڭ ۇيلەستىرۋىمەن ەسىرتكى زاتتارىن جەتكىزۋدىڭ 23 ارەكەتىنىڭ جولىن كەستى. وتكەن 2021 جىلى ەسىرتكى زاتتارىن قازاقستانعا اكەلۋدىڭ 14 فاكتىسىنىڭ جولى كەسىلگەن.

وتكەن جىلى دا، اعىمداعى جىلى دا نەگىزىنەن ەسىرتكى زاتتارىن اقش، كانادا جانە نيدەرلاندىدان اكەلۋگە تىرىستى. ۇستالعان ەسىرتكى قۇرالدارىنىڭ 69،6%-ى اقش-تان اكەلىنگەنى بايقالادى.

اعىمداعى جىلدىڭ 7 ايىندا ەسىرتكى ۇستاۋدىڭ 23 فاكتىسى انىقتالدى، ونىڭ ىشىندە 16 «ماريحۋانانى» اكەلۋ فاكتىسى، 2 «گاشيشتى» اكەلۋ فاكتىسى، 1 «MDMA (ەكستازي) جانە كوكاين» ەسىرتكى قۇرالدارى انىقتالعانىن اتاپ وتكەن ءجون.

قاسكۇنەمدەر ەسىرتكىنى جەتكىزۋدىڭ كۇردەلى ادىستەرىن قولدانۋدا. تۇرمىستىق تەحنيكادا، ويىنشىقتاردا، بالالار تاماعىنا ارنالعان ىدىستاردا جانە باسقا دا زاتتاردا ەسىرتكى قۇرالدارىن اكەلۋ ارەكەتتەرى جۇزەگە اسىرىلعان.

سوڭعى جاعدايدى مىسالعا كەلتىرسەك، 2022 جىلدىڭ تامىز ايىندا «جەتىسۋ» كەدەن بەكەتىندە حالىقارالىق پوچتا جونەلتىلىمدەرى ۋچاسكەسىندە «Rapiscan» كەدەندىك باقىلاۋدىڭ تەحنيكالىق قۇرالدارىن قولدانۋ جولىمەن سالەمدەمەگە كەدەندىك باقىلاۋ جۇرگىزۋ كەزىندە ەسىرتكى زاتتارىنا كۇدىكتى سالەمدەمە ۇستالدى. سالەمدەمە ودەسسادان الماتىعا باعىتتالعان. «TruNarc» ءپورتاتيۆتى اناليزاتورىنىڭ مالىمەتتەرى بويىنشا، 200 «MDMA» تابلەتكالارى مەن 5 گرامم ۇنتاق مولشەرىندەگى ەسىرتكى زاتتار «ەكستازي» جانە «كوكاين» بولىپ تابىلادى، ولار بالالار تاماعىنىڭ ىشىندە جاسىرىلعان.

بارلىق ماتەريالدار پروسەسسۋالدىق شەشىمدەر قابىلداۋ ءۇشىن قۇقىق قورعاۋ ورگاندارىنا بەرىلدى.