الماتىدا ەسىرتكى قىلمىسىنا قاتىسى بار دەگەن كۇدىكپەن شەتەلدىكتەر ۇستالدى

ولاردىڭ قىلمىستىق ارەكەتتەرىن ەسىرتكى قىلمىسىنا قارسى كۇرەس ءبولىمىنىڭ قىزمەتكەرلەرى ارنايى ءىس-شارا بارىسىندا اشكەرەلەدى.

پاكىستان مەن ءۇندىستاننىڭ ەكى ازاماتى الماتىدا ەسىرتكى كاسىبىن باستاعان. ولاردىڭ ءبىرى الماتىداعى جوعارى وقۋ ورىندارىنىڭ بىرىندە وقيدى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«كۇدىكتىلەر وزدەرىنىڭ قىلمىستىق ارەكەتتەرىن جۇزەگە اسىرۋ ءۇشىن جەكە ءۇيدى جالعا العان – ءبىر قىزىعى، “مياۋ” ءفيلمىنىڭ كەيىپكەرلەرى ەسىرتكى زەرتحاناسىن ۇيىمداستىرعان ءۇيدى. تۇرعىن ءۇيدى ءتىنتۋ كەزىندە ساتۋعا دايىن اسا ءىرى كولەمدەگى سينتەتيكالىق ەسىرتكى، زەرتحانالىق جابدىقتار، پرەكۋرسورلار تابىلدى جانە تاركىلەندى. شەتەلدىكتەردىڭ جۇپتاسىپ جۇمىس ىستەگەنى انىقتالدى: ءبىرى ەسىرتكىنى قايناتسا، ەكىنشىسى ونى جاسىرىن قويۋ ارقىلى تاراتقان. ايتپاقشى، ىزدەستىرۋ شارالارى قاسكويلەردىڭ تۇرعىلىقتى جەرىندە دە جۇرگىزىلدى. ولار “سينتەتيكا” سالىنعان بايلامداردى جاتىن بولمەسىندە ساقتاعان. تاركىلەنگەن سينتەتيكالىق پسيحوتروپتىق زاتتاردىڭ جالپى سالماعى 4 كەلىدەن اسادى. كۇدىكتىلەر قاماۋعا الىندى»، – دەدى الماتى قالالىق پوليسيا دەپارتامەنتى باستىعىنىڭ ورىنباسارى قۋاتبەك ناۋاتوۆ.

ق ر قك-نىڭ 201-بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى. ق ر كونستيتۋسياسىنىڭ 77-بابى 3ء-بولىمى 1-تارماعى، ق ر قك-نىڭ 19-بابى 1-تارماعىنا ساي كەز كەلگەن ازامات سوت شەشىمى زاڭدى كۇشىنە ەنگەنگە دەيىن كىناسىز دەپ سانالادى.