الماتىدا ەسىرتكى ساۋداسىمەن اينالىسقان ۇيىمداسقان قىلمىستىق توپتىڭ 10 مۇشەسى ۇستالدى. بۇل توپ پرەكۋرسورلار مەن ناركولابوراتوريالارعا قاجەتتى جابدىقتاردى قازاقستاننىڭ ءارتۇرلى وڭىرلەرىنە جەتكىزۋمەن اينالىسقان، دەپ حابارلايدى aqshamnews.kz.
قىلمىستىق توپ ءوز ارەكەتتەرىن ۇيلەستىرۋ ءۇشىن Telegram مەسسەندجەرىن پايدالانعان. وپەراسيا بارىسىندا ءۇش قويمادا پرەكۋرسورلار ساقتالىپ تۇرعانى انىقتالدى. تاركىلەنگەن زاتتاردىڭ جالپى سالماعى ءۇش توننانى قۇراپ، قۇنى 420 ميلليون تەڭگەدەن اسادى. سونداي-اق، ەسىرتكى وندىرۋگە ارنالعان قۇرال-جابدىقتار دا الىنعان.
«قۇقىق قورعاۋ ورگاندارى كۇدىكتىلەردى ۇستاپ، قاماۋعا الدى. قازىرگى ۋاقىتتا تەرگەۋ امالدارى جۇرگىزىلۋدە. تەرگەۋ ماقساتىندا قىلمىستىق توپتىڭ بارلىق قاتىسۋشىلارى انىقتالىپ، باسقا دا وسى ىسكە قاتىسى بار تۇلعالار بەلگىلى بولادى»، — دەپ حابارلادى ىشكى ىستەر مينيسترلىگى.